Fota: sacyjalnyja sietki
Zdareńnie adbyłosia 1 lipienia.
«My byli sa znajomymi ŭ parku, razmaŭlali pra vajnu va Ukrainie, rabili heta pa-rusku. Pobač išli dva palaki. Jany stali hladzieć na nas, što my robim. Sieli na susiedniuju łaŭku i pačali z nami razmaŭlać pa-rusku, u ich byŭ akcent.
Jany zapytalisia, čamu my nie ŭ vojsku i nie baronim Ukrainu. Taksama jany raskazali, što takich, jak my, tut nie čakajuć, nam treba viartacca va Ukrainu. Ja tak zrazumieŭ, što ŭkraincaŭ jany taksama nie lubiać», — raskazvaje Antoś.
Paśla chłopiec patłumačyŭ, što jany biełarusy.
«Hetyja dva palaki adrazu pačali havaryć, što my kraina-ahresar, stali vyhaniać nas z parka. Kryčali, što ŭ Polščy takija ludzi nie patrebnyja. Ja by acaniŭ heta ŭsio jak niejki nacyjanalistyčny nastroj ź ich boku.
My sa znajomymi stali adchodzić, jany za nami. Ja jašče tłumačyŭ, što žyvu ŭ Polščy ŭžo dzieviać hadoŭ. «Viartajsia dadomu», — adkazali hetyja mužčyny», — zhadvaje jon.
Paśla hetaha adzin ź ich udaryŭ Antosia pa hałavie. Muzyka ŭpaŭ, straciŭ prytomnaść i paškodziŭ nahu.
«Siabry maje, kaniečnie, byli ŭ šoku, — kaža jon. —
Siarod ich byli muzyki, jakija ŭ Polšču pryjechali na reabilitacyju paśla taho, jak ich źbili amapaŭcy.
Pierad tym, jak ja atrymaŭ pa hałavie, my razmaŭlali pra toje, što biełarusaŭ ciapier nichto nie lubić: ni rasijanie, ni ŭkraincy. I ciapier, atrymlivajecca, i palaki».
Fota: sacyjalnyja sietki
Potym Antoś ubačyŭ, što ŭ jaho idzie kroŭ. Udaryli jaho maleńkim kastetam.
«Vyhladali hetyja dva mužčyny hadoŭ na 40. Nakont ich nie viedaju, ale my ŭ stanie ałkaholnaha apjanieńnia nie byli.
Spačatku my pajšli kuplać lod, spyniali kroŭ. U hety samy dzień ja pajšoŭ u palicyju i padaŭ zajavu. Na nastupny dzień jany pajechali na miesca, kab pahladzieć kamiery videanazirańnia. Skazali, što kali znojduć mužčyn, to mnie treba budzie pryjechać i spraŭdzić, što heta tyja. Havaryli, što ŭ takim vypadku budzie sud. Nakont taho, nakolki vierahodna ich znajści, ničoha nie skazali», — dzielicca chłopiec.
Ciapier Antoś adčuvaje siabie narmalna. U balnicu jon nie źviartaŭsia.
«Samu situacyju ŭsprymaju narmalna. Siarod palakaŭ jość ludzi, jakija lubiać Łukašenku, chodziać na 9 maja da rasijskaj ambasady. Ciapier ŚMI ŭ Jeŭropie pišuć pra Biełaruś, jak krainu-ahresara. Tut mała ludziej viedaje ab pratestach, palitviaźniach. Atrymlivajecca, što nichto nie viedaje pra 2020 hod, ale ŭsie ŭ kursie, što Biełaruś zamiašanaja ŭ vajnu».
Čytajcie taksama:
Polšča pačnie prymać zajavy biełarusaŭ na humanitarnyja dazvoły na žycharstva z 8 lipienia
Ad 20 da 100 adsotkaŭ u plus. Jak źmianilisia ceny na techniku ŭ paraŭnańni ź lutym
