— Raniej my imiony im davali, — raskazvaje Anastasija Čarniaŭskaja. — Ale sioleta ptušak było ŭžo dzieviać. Dzie ŭžo prydumaješ stolki imionaŭ? Ja sama ŭ ich błytajusia, choć paradkavyja numary pryznačaj. Ptuški roznyja — i darosłyja, i maleńkija, jakija atrymali paškodžańni, vypaŭšy z hniazda. Ludzi padbirajuć, paviedamlajuć pra heta ŭ achovu pryrody, atrymlivajuć u hetaj arhanizacyi dazvoł i viazuć busłoŭ nam.
Čarniaŭskija lečać ptušak, kormiać, dahladajuć ich, ciarpliva čakajuć, pakul jany zmohuć samastojna lotać i znachodzić sabie ježu, potym vypuskajuć na volu.
Ale 15 žniŭnia z adnym busłam zdaryłasia biada.
Ptušku z paškodžanaj łapkaj Čarniaŭskim pryvieźli tydzień tamu ź vioski Mazali.
— Łapka ŭ busła była paškodžana, pačałosia hnijeńnie. My abrezali padhniłuju častku, pierabintavali, lačyli ptušku antybijotykami, apracavali jaje ad vošaj. Dva dni ŭ busła była depresija, z-za jakoj jon admaŭlaŭsia ad ježy. Potym my padviali jaho da valjera z dvuma surodzičami, kab pahladzieŭ, jak jany jaduć, i jamu taksama zachaciełasia.
Pa słovach Anastasii, znosiny z sabie padobnymi dapamahli. Ptuška stała jeści «jak nie ŭ siabie», čatyry razy na dzień. Tolki paśpiavali padnosić rybu.
Pacichu stali vypuskać busła pahulać na dvor. Jon machaŭ kryłami, raspracoŭvajučy ich. 15 žniŭnia byŭ šosty dzień znachodžańnia ptuški ŭ siadzibie Čarniaŭskich.
— Padniaŭsia viecier, busieł padchapiŭ hetuju pavietranuju chvalu i, niby deltapłan staŭ płaniravać u napramku horada, da jakoha kala kiłamietra, — raspaviadaje Anastasija. — My ź dziećmi abyšli ŭsiu viosku, bližejšyja pali, ale nie znajšli busła. Ludzi nam kazali, što bačyli, jak jon lacieŭ nizka nad ziamloj ź pierabintavanaj łapkaj u napramku Lasnych.
Nastaśsia adznačaje, što, kali ptušku nie znajści, jana moža zahinuć, prosta pamierci z hoładu. Busieł da hetaha času maje patrebu ŭ antybijotykach i pakul nie moža sam zdabyvać sabie ježu. Kali b nie łapka, Anastasija nie pieražyvała b za jaho. Busieł znajšoŭ by svaich sabrataŭ, prybiŭsia da ich, i ŭsio było b dobra, ale ŭ ciapierašnim jaho stanie heta niemahčyma.
Čarniaŭskija źviartajucca da miascovych žycharoŭ: kali busieł pryziamliŭsia ŭ vas u dvary, patelefanujcie im pa telefonie 8 (029) 569-77-21.
I nie karmicie jaho salonym i smažanym.
