Fota: Sputnik / Ina Hryšuk
Archieołahi skončyli pracu na budaŭničaj placoŭcy kala doma Muraŭjova i hatela Siamaški ŭ centry Hrodna, dzie padčas kapańnia katłavana budaŭniki natknulisia na kulturny płast XV stahodździa.
Ab zaviaršeńni archieałahičnych daśledavańniaŭ na budplacoŭcy paviedamiŭ ich kiraŭnik — navukovy supracoŭnik Instytuta historyi NAN Andrej Vajciachovič. U najbližejšy čas jon budzie vyvučać usie znachodki, vyjaŭlenyja padčas archieałahičnaha nahladu, a zatym paabiacaŭ raskazać pra ich padrabiaźniej.
Artefakty XII-XVIII stahodździaŭ
Padčas archieałahičnaha nahladu na miescy ciapierašniaha katłavana archieołah vyjaviŭ 16 ružejnych kremieniaŭ XVIII stahodździa i pradmiety XVII stahodździa — maniety, šporu, kavałački piačnych kaflaŭ z kvietkami, vyjavaj drakona. Taksama padčas kapańnia katłavana byli adkrytyja frahmienty padvalnych ścien i aračnych sklapieńniaŭ staradaŭniaha budynka. Ich vyrašyli nie zachoŭvać, tolki zrabili zamiery, sfatahrafavali i nanieśli na schiemu dla vynikovaj spravazdačy.
Na ŭčastku, dzie prachodzili archieałahičnyja daśledavańni, u pieršyja dni byli znojdzienyja cikavyja pradmiety prykładna XV — pačatku XVI stahodździaŭ. Heta frahmienty skury, kieramiki, mietaličnyja pradmiety, naprykład, ihołki, kavałak naža, dźvie žanočyja zašpilki-sadki, maniety, frahmienty draŭlanych kanstrukcyj mastavoj i aharodžy. Samy staražytny z vyjaŭlenych artefaktaŭ — nakaniečnik strały, datavany XII-XIII stahodździem, jaki moh vykarystoŭvacca dla palavańnia. Jašče adna redkaja znachodka — heta frahmient tkaniny, jakaja maje pryhožuju strukturu i niadrenna zachavałasia.
Tym časam na placoŭcy la doma Muraŭjova praciahvajucca budaŭničyja raboty — na hetym tydni pačali śvidravać pali, jakija nadaduć dadatkovuju ŭstojlivaść budučamu budynku.
Budaŭničyja raboty na rahu płoščy Savieckaj i vulicy Kalučynskaj pačalisia ŭ siaredzinie minułaha miesiaca: 13 vieraśnia tut pačali kapać katłavan. Zakazčyk rabot — hrodzienski biznesoviec Stanisłaŭ Siamaška, jakomu naležać try susiednija budynki. Učastak jon kupiŭ hod tamu na aŭkcyjonie za 30 tysiač rubloŭ. Tut pavinny ŭźvieści budynak hramadskaha pryznačeńnia. Pa zaćvierdžanym Ministerstvam kultury prajekcie, adzin z fasadaŭ vykanany pad daŭninu i vizualna padobny na dom Łapinych kanca XIX stahodździa, druhi — u styli «madern» ź vialikimi panaramnymi voknami i častkova zašklonym dacham. Akramia taho, budynak budzie mieć padvalnyja pamiaškańni i mansardny pavierch.
Navabud uzvodzicca na miescy stračanaha ŭ siaredzinie minułaha stahodździa staradaŭniaha doma XVIII-XIX stahodździaŭ. Jon naležaŭ kupcu Kurlandskamu, u im raźmiaščalisia fotamajsternia, aptečny skład, stamatałohija. Budynak byŭ mocna paškodžany padčas Druhoj suśvietnaj vajny, pryznany avaryjnym, niekalki hadoŭ stajaŭ u vyhladzie ruin. U 50-ja hady jaho źnieśli, a padvały zasypali. Na hetym miescy doŭhi čas znachodziŭsia draŭlany budynak, u 90-ja hady jaho demantavali, z tych časoŭ učastak pustavaŭ.
Z pačatku budaŭničych rabot na abjekcie haradžan aburyła, što jany prachodziać biez archieałahičnych daśledavańniaŭ. Kali kapali katłavan, pravodziŭsia archieałahičny nahlad, a vykapanuju ziamlu vyvozili na hruzavikach. Usie raboty byli zaćvierdžanyja Ministerstvam kultury.
Uviečary 16 vieraśnia, kali budaŭniki amal skončyli kapać katłavan, na jaho krai znajšli pradmiety mierkavana XV stahodździa. Učastak abharadzili, dostup budaŭnikoŭ tudy zakryli, a 20 vieraśnia na ŭčastku płoščaj prykładna 40 kvadratnych mietraŭ pačalisia archieałahičnyja daśledavańni.
Čytajcie taksama:
Ci jość kulturny płast na budoŭli ŭ centry Hrodna?
U centry Hrodna pačali budoŭlu i vykapali staradaŭnija padvały. Ale archieałahičnych raskopak nie pravodzili
