Biełaruś vystupaje za toje, kab u samitach «Vialikaj dvaccatki» prymali ŭdzieł pradstaŭniki bujnych rehijanalnych arhanizacyj, u pryvatnaści JeŭrAzES.
Ab hetym ministr zamiežnych spraŭ Biełarusi Siarhiej Martynaŭ zajaviŭ na pres‑kanfierencyi 29 vieraśnia.
«My ličym, što treba pašyrać mižnarodnaje partniorstva i adpaviednyja dyskusii pa važniejšych temach za miežy vuzkich hrup dziaržaŭ», — adznačyŭ kiraŭnik biełaruskaha MZS.
Pavodle słoŭ Siarhieja Martynava, toj fakt, što ad samitaŭ «Vialikaj vaśmiorki» pierajšli da samitaŭ «Dvaccatki», — užo śviedčańnie taho, što «praces u hetym napramku pajšoŭ, i hałoŭnaje ŭ hetym nie spyniacca».
Ministr zamiežnych spraŭ Biełarusi kanstatavaŭ pradaŭžeńnie dyskusii ab reformie struktury AAN. Na žal, roznyja dziaržavy pakul nie znajšli dastatkova ahulnych padychodaŭ, kab było realnym raźličvać na kankretnuju realizacyju ŭ bližejšy čas pačynańniaŭ u hetaj śfiery, adznačyŭ Siarhiej Martynaŭ. Pry hetym, pavodle jaho słoŭ, dla ŭsioj suśvietnaj supolnaści źjaŭlajecca vidavočnym, što sistema AAN, sfarmiravanaja ŭ 1940‑ch hadach, užo daloka nie ŭ poŭnaj miery adpaviadaje sučasnym realijam mižnarodnych adnosin. «I ŭ hetym častkova pryčyna niedastatkovaj efiektyŭnaści AAN», — padkreśliŭ kiraŭnik MZS Biełarusi
