Juryj Stanieŭski
Sudovy praces vioŭ sudździa Anatol Zajac.
Stanieŭskaha abvinavacili pa šerahu artykułaŭ Kryminalnaha kodeksa:
- č. 1 art. 368 — abraza prezidenta Respubliki Biełaruś;
- č. 370 — ździek ź dziaržaŭnych simvałaŭ;
- č. 2 art. 366 — hvałt albo pahroza ŭ dačynieńni da słužbovaj asoby, jakaja vykonvaje słužbovyja abaviazki;
- art. 369 — źniavaha pradstaŭnika ŭłady;
- č. 1 art. 130 — raspalvańnie inšaj sacyjalnaj varožaści;
- č. 1 art. 366 — hvałt albo pahroza ŭ dačynieńni da słužbovaj asoby, jakaja vykonvaje słužbovyja abaviazki, ci inšaj asoby, jakaja vykonvaje hramadski abaviazak.
38-hadovaha Juryja Stanieŭskaha zatrymali pry kancy śniežnia 2021 hoda i dastavili ŭ Minsk, u SIZA KDB. Potym pieraviali ŭ turmu №1 Hrodna.
Zhodna z materyjałami spravy, Juryj Stanieŭski z 15 lipienia da 27 śniežnia 2021 hoda pad publikacyjami «ŭ destruktyŭnym Telegram-čacie raźmiaščaŭ paviedamleńni, nakiravanyja na raspalvańnie nacyjanalnaj, relihijnaj i inšaj sacyjalnaj varožaści ŭ dačynieńni da vyłučanych im u paviedamleńniach sacyjalnych hrup, u tym liku asob inšaj nacyjanalnaści i inšaha vieravyznańnia».
Tam ža nibyta ŭtrymlivalisia abrazy ŭ adras prezidenta Respubliki Biełaruś, inšych pradstaŭnikoŭ ułady i ich blizkich, a taksama hučali pahrozy ŭ dačynieńni da słužbovych asob, jakija vykonvajuć svaje słužbovyja abaviazki, uklučajučy kiraŭnika dziaržavy, i ich blizkich.
U publikacyjach, pavodle abvinavačańnia, byli paviedamleńni, źviazanyja sa ździekam ź dziaržaŭnych himna Respubliki Biełaruś i ściaha.
Sudovaja kalehija pa kryminalnych spravach Hrodzienskaha abłsuda pryznačyła Stanieŭskamu kančatkovaje pakarańnie ŭ vyhladzie pazbaŭleńnia voli na termin siem hadoŭ z adbyvańniem u papraŭčaj kałonii va ŭmovach uzmocnienaha režymu sa štrafam u pamiery 50 bazavych vieličyń (1,6 tysiačy rubloŭ).
