Siońnia spoŭniłasia b 50 adnamu sa stvaralnikaŭ pieršaha niefarmalnaha litaraturnaha abjadnańnia «Tutejšyja» Anatolu Sysu. Užo bolš za čatyry hady jaho niama siarod žyvych.Za hety čas adny jahonyja prychilniki paśpieli dałučyć paeta da nacyjanalnaha Panteonu, inšyja praciahvajuć šukać pryčyny jahonaha trahičnaha losu. Trecija ž źbirajuć paraskidanyja paetavy tvory i vydajuć jahonyja knihi.
Paetka Volha Kurtanič vučyłasia z Anatolem Sysom u Homielskim dziaržaŭnym univiersitecie. Jana zhadvaje, jak mocna vyłučaŭsia małady paet siarod astatnich studentaŭ, što pačynali siabie śćviardžać u litaratury.
«Nam, studentam 80‑ch Homielskaha ŭniviersitetu paščaściła. Paščaściła, što siarod našych paetaŭ i prazaikaŭ vyłučaŭsia Anatol Sys, čałaviek, za jakim chaciełasia ciahnucca i z kim chaciełasia paraŭnoŭvać svaju tvorčaść.Pamiataju, kali my ŭsie ŭžo vyjšli z univiersitetu dypłamavanymi i Anatol pryjechaŭ na pracu ŭ Miensk, tut adbyvałasia toje ž samaje. Narod tvorčy adrazu abraŭ jaho za kumira. U jaho była vialikaja charyzma, mocny charaktar, mahutny tvorčy chrybiet i vydatny tvorčy tramplin. Chaciełasia b vieryć, što pamiać pra Anatola zachavajuć nia tolki tyja, chto jaho viedaŭ, ale i tyja, chto tolki‑tolki znajomicca z tvorčaściu Sysa».
Kniha vybranych vieršaŭ Anatola Sysa «Ałaiza», jakaja vychodzić da jubilejnaj daty, jakraz adrasavanaja tym, chto ŭ svoj čas raźminuŭsia ź jaho pryžyćciovymi zbornikami «Ahmień», «Pan Les» i «Sys». «Ałaiza» vychodzić, dziakujučy rupnaści litaraturaznaŭcy, pravaabaroncy i siabra paeta z 1979 hodu Alesia Bialackaha.
«Da nas u hrupu pieršakurśnikaŭ zajšoŭ chłopiec sa starejšaha kursu ź bialavymi vałasami, z trochi vyračanymi vačyma, jaki abviaściŭ, što zaprašaje ŭsich paetaŭ na litaraturnuju supołku «Krynica», jakaja była pry Homielskim univiersitecie. Na hetych pasiadžeńniach «Krynicy» my paznajomilisia z Anatolem značna bližej. Jon byŭ uvieś pahružany ŭ biełaruskuju paeziju. Kultavymi paetami dla jaho tady byli Aleś Razanaŭ i Uładzimier Niaklajeŭ. Jon vučyŭsia ad ich, jon sprabavaŭ ekśpierymientavać sam. Što mianie asabliva mocna ŭ im uražvała i akazała vialiki ŭpłyŭ — heta jahonaja nadzvyčajnaja pracavitaść. Kali jon zaharaŭsia niejkaj idejaj, niejkaj temaj i pačynaŭ pisać, to dla jaho tady ŭžo prosta ničoha nie isnavała. Jon chadziŭ z natatnikam i asadkaju pa internacie i biaskonca prahavorvaŭ roznyja varyjanty radkoŭ. My ŭsie padpitvalisia toj tvorčaj stanoŭčaj enierhijaj, jakaja sychodziła ad Anatola».
Siońnia ŭ Miensku ŭ Dziaržaŭnym muziei historyi biełaruskaj litaratury, u Homieli ŭ pryvatnym domie na vulicy Paleskaj, 52 i ŭ centralnaj rajonnaj biblijatecy Rečycy projduć viečary, pryśviečanyja 50‑hodździu Anatola Sysa.
A 31 kastryčnika ŭ vioscy Haroškaŭ na Homielščynie projdzie vialiki litaraturny fest, u časie jakoha na ścianie rodnaj chaty paeta budzie adčynienaja miemaryjalnaja šylda.
