Štab-kvatera Googleplex. Fota: Wikimedia Commons
Jak piša Washington Post, takim čynam Google choča viarnuć ludziej u ofisy. Čamu kampanija da hetaha imkniecca?
Byŭ čas, kali Google padavała svaju štab-kvateru jak najlepšy dom. U rasparadžeńni supracoŭnikaŭ byli pali dla plažnaha valejboła, fitnes-centry, skaładromy i boŭlinh, piedykiur i masaž. U vyniku mnohija supracoŭniki vyjazdžali z kampusa Google ŭ Maŭncin-Vju (Mountain View) u štacie Kalifornija, tolki kab paspać.
U 2020-m pryjšła pandemija, i Google adnoj ź pieršych amierykanskich kampanij adpraviła svaich supracoŭnikaŭ pa damach. Pry hetym kožny atrymaŭ fiksavanuju vypłatu ŭ pamiery 1000 dalaraŭ na ŭładkavańnie chatniaha ofisa.
Videakanfierencyi i vobłačnyja servisy, prapanavanyja Google, spraščali ludziam va ŭsim śviecie pracu z domu padčas pandemii i praciahvajuć heta rabić i siońnia. Ale ciapier Google starajecca viarnucca ad dystancyjnaj pracy ŭ ofis.
Žurnalistam haziety Washington Post trapiła słužbovaja zapiska kampanii, zhodna ź jakoj uvodzicca abaviazkovaje naviedvańnie ofisaŭ try dni na tydzień. Kožny, chto budzie advilvać, pavinien być hatovy da taho, što heta budzie mieć niehatyŭny ŭpłyŭ na jaho słužbovuju atestacyju.
Patrabavańnie ab trochdzionnym znachodžańni ŭ ofisie dziejničaje ŭ Google z krasavika 2022 hoda. Ale, vidać, mnohija supracoŭniki da hetaj pary jaho nie vykonvajuć. Navat u raskošnaj štab-kvatery kampanii ŭ Maŭncin-Vju mnohija pracoŭnyja stały pustujuć, jak piša The Washington Post.
«Niama nijakich sumnievaŭ u tym, što sumiesnaja praca ŭ adnym pamiaškańni maje pazityŭnaje značeńnie», — pieradaje vydańnie słovy dyrektarki pa piersanale Google Fijony Čykoni (Fiona Cicconi).
U słužbovaj zapiscy tłumačycca, što tyja, chto pravodzić try dni na tydzień u ofisie, adčuvajuć siabie bolš źviazanymi sa svaimi kalehami. Navat kali vy nie vierycie ŭ «čaroŭnyja razmovy ŭ kalidory», «niama nijakich sumnievaŭ u tym, što sumiesnaja praca ŭ adnym pakoi maje stanoŭčaje značeńnie»,
— cytuje vydańnie słovy Čykoni.
Novaje paviedamleńnie ad kiraŭnictva ab tym, što nievykanańnie patrabavańniaŭ moža niehatyŭna paŭpłyvać na vyniki atestacyi pracy, rascanili jak samuju ahresiŭnuju sprobu prymusić ludziej prychodzić u ofis. Pra heta zajaviŭ vydańniu adzin z supracoŭnikaŭ na ŭmovach ananimnaści.
Pa jaho słovach, heta moža pryvieści da taho, što šmat chto zvolnicca pa ŭłasnym žadańni ci budzie zvolnieny. Viadoma, što ŭ studzieni hetaha hoda Google zvolniŭ 12 000 supracoŭnikaŭ. Amazon i Facebook taksama praviali masavyja skaračeńni.
«Naš hibrydny padychod raspracavany takim čynam, kab spałučać u sabie najlepšaje ad asabistaj prysutnaści ź pieravahami pracy z domu na praciahu častki tydnia. Ciapier, kali my vykarystoŭvajem hety sposab pracy bolš za hod, my aficyjna intehrujem hety padychod va ŭsie našy stratehii adnosna pracy»,
— cytuje Washington Post pradstaŭnika Google Rajana Łamanta (Ryan Lamont).
Mnohija amierykanskija kampanii prytrymlivajucca toj ža pazicyi: jany nastojvajuć na viartańni ludziej da pracy z ofisa.
U toj ža čas supracoŭniki zvykli da pracy z domu i nie chočuć mianiać novanabytych zvyčak. Pa źviestkach Washington Post, supracoŭniki Disney i Amazon užo stvaryli pietycyi z patrabavańniem dazvolić nie pryjazdžać u ofis. Jany śćviardžajuć, čto viartańnie ŭ ofisy paŭpłyvaje na ich vytovorčaść, psichičnaje zdaroŭje i bałans pamiž pracaj i asabistym žyćciom.
Adnak šmat chto z kiraŭnikoŭ niepachisnyja ŭ tym, što ofis pa-raniejšamu zastajecca nieabchodnym źvianom, jaki złučaje inavacyi i supracoŭnictva, a miascovyja orhany ŭłady vielmi chočuć, kab rabotniki viarnulisia, bo heta dapamoža ažyvić dziełavyja centry, jakija adčuvajuć ciažkaści.
Čytajcie jašče:
ES zaklikaŭ Google i Facebook markiravać kantent, stvorany štučnym intelektam
TikTok raście, Google daminuje, a «Jandeks» hublaje pazicyi. Jakija jašče asnoŭnyja trendy bajnetu?
