Pra jakija novaŭviadzieńni idzie havorka?
Dakumientam praduhledžvajecca šerah novaŭviadzieńniaŭ. Bolš padrabiazna ź imi možna aznajomicca tut.
Kali koratka, ukaz praduhledžvaje stvareńnie rejestra aŭtamabilnych pieravozak pasažyraŭ u nierehularnych znosinach. U jaho budzie ŭklučana infarmacyja ab pieravozčykach, transpartnych srodkach, kiroŭcach, dyśpietčarach pieravozak pasažyraŭ u nierehularnych znosinach, dyśpietčarach taksi. Dziejnaść biez uklučeńnia ŭ rejestr budzie zabaronienaja. Dla niadobrasumlennych pieravozčykaŭ i dyśpietčaraŭ praduhledžvajucca miechanizmy prypynieńnia ich dziejnaści i vyklučeńnia z rejestra.
Uniasieńnie ŭ rejestr budzie płatnym: dźvie bazavyja vieličyni za adzin transpartny srodak, adna bazavaja vieličynia za kiroŭcu, za dyśpietčara taksi nieabchodna budzie zapłacić 100 bazavych vieličyń.
Akramia taho, zamiežnyja kampanii majuć prava akazvać pasłuhi dyśpietčara pieravozak pasažyraŭ u nierehularnych znosinach, dyśpietčara taksi tolki ŭ vypadku stvareńnia imi na terytoryi Biełarusi jurydyčnaj asoby.
Pieravozčyki pavinny buduć ustalavać sistemy videafiksacyi pracesu pieravozak pasažyraŭ.
Na pravavym forumie z 8 pa 18 červienia było praviedziena hramadskaje abmierkavańnie ŭkaza. Pastupiła 61 prapanova ad 50-ci karystalnikaŭ. Dniami na pravavym partale była apublikavanaja infarmacyja ab vynikach hramadskaha abmierkavańnia. Mintrans pa vynikach abmierkavańnia ŭličyŭ dźvie zaŭvahi.
Pieršaja — u prajekcie ŭkaza adznačałasia, što termin zachoŭvańnia infarmacyi ab zamovach, u tym liku atrymanych z vykarystańniem srodkaŭ elektrasuviazi i internetu (vykananych i niavykananych), składzie piać hadoŭ. Paśla taho, jak karystalniki źviarnuli ŭvahu, što heta supiarečyć normam dziejnaha zakanadaŭstva, u ministerstvie pahadzilisia i skaracili pieryjad da hoda.
Druhaja zaŭvaha tyčyłasia videafiksacyi ŭ sałonach taksi. Pieršapačatkova prapisvałasia, što termin zachoŭvańnia danych, atrymanych takim šlacham, składaje miesiac. Ciapier jaho pamienšyli da dziesiaci dzion.
Novyja vydatki lahuć na plečy spažyŭca
Žurnalisty vyrašyli spytać mierkavańnie kiroŭcaŭ taksi, što jany dumajuć pra źmieny.
Čaściej za ŭsio apytanyja taksisty raspaviadali, što heta nie źmienić rynku ŭ lepšy bok, a, naadvarot, adbudziecca rost cen na pasłuhi taksi, viartańnie da šeraha rynku, ludzi buduć brać mašyny «ad borta», jak było kaliści.
«Usio heta baluča ŭdaryć u pieršuju čarhu pa vadzicielach i klijentach. Usie pačnuć šukać niejkija ščyliny, uźniknuć prablemy va ŭsich udzielnikaŭ haliny. Usie novyja vydatki lahuć na plečy spažyŭca», — padzialiŭsia svaim mierkavańniem taksist Alaksandr.
«Chacieli jak lepš, a atrymałasia jak zaŭsiody. Voś što mahu skazać pra ŭsio heta», — dadaŭ mužčyna. Jon upeŭnieny, što ŭsie hetyja źmieny byli inicyjavanyja z adnoj pryčyny: niekatoryja aŭtaparki nie płaciać padatkaŭ dziaržavie.
«Siońnia adkryvajucca firmy-adnadzionki na padstaŭnych asob, a potym źnikajuć. Atrymlivajecca, dziaržava hublaje hrošy, voś jana i rašyła ŭmiašacca», — skazaŭ taksist.
Taksist Andrej ličyć, što adnaznačna varta čakać rostu taryfaŭ. Jon, u svaju čarhu, rastłumačyŭ, čym heta pahražaje rynku.
«Dapuścim, płaciŭ za pajezdku 5—6 rub., a pryjdziecca 10—15 rub. Kolki zastaniecca pasažyraŭ, hatovych płacić za taksi zusim inšyja hrošy? A kiroŭcaŭ, miž inšym, u krainie vielmi šmat», — dadaŭ Andrej.
Na dumku jašče adnaho taksista Uładzimira (imia źmieniena na prośbu kiroŭcy), usio vierniecca da taho, što znoŭ usie pačnuć pracavać ad bardziura i jašče bolš stanie čornaha nału.
«Mahčyma, usio idzie da taho, kab pakinuć na rynku tolki niekalki bujnych aŭtaparkaŭ», — vykazaŭ jašče adzin punkt hledžańnia taksist Leanid.
Videafiksacyja: mierkavańni padzialilisia
Što tyčycca novaŭviadzieńniaŭ ab videafiksacyi, mierkavańni siarod apytanych taksistaŭ u hetym pytańni padzialilisia.
«Ja ŭžo zamoviŭ dźvie kamiery, adna budzie ŭnutry sałona, druhaja — zvonku. Ščyra pryznajusia, ja tolki «za», heta budzie dyscyplinavać pasažyraŭ. Traplajucca vielmi roznyja ludzi: i vypiŭšyja, i tyja, što matam łajecca», — raspavioŭ Alaksandr.
Dvoje inšych taksistaŭ, ź jakimi ŭdałosia pahutaryć, taksama vykazalisia na karyść videanazirańnia. Pa ich słovach, časam uźnikajuć sprečnyja situacyi pamiž kiroŭcam i klijentam, a najaŭnaść kamiery ŭ sałonie dapamoža ich vyrašyć.
Procilehłaha punktu hledžańnia prytrymlivajucca taksisty Andrej, Uładzimir i Leanid.
«Heta ŭsio robicca, kab nas kantralavać, — miarkuje Leanid. — Kamu heta spadabajecca?»
Uładzimir u cełym, pa jaho słovach, nie ŭjaŭlaje, jak vybudavać sistemu zachoŭvańnia takoj kolkaści infarmacyi.
«Pamier videafajłaŭ vialiki, nieabchodna šmat miesca. Jak heta naohuł možna realizavać? I heta ž znoŭ vydatki», — zadajecca pytańniem taksist.
Akramia taho, taksisty akcentavali ŭvahu na takich važnych niuansach, jak kanfidencyjalnaść i abarona danych, i prablemie ich zabieśpiačeńnia.
Čytajcie taksama:
Jandeks Go patłumačyŭ, ci atrymaje FSB dostup da źviestak biełarusaŭ
