Pavodle dvuch bujnych daśledavańniaŭ, praviedzienych u Kanadzie i Šviecyi, ludzi, jakich apierujuć žančyny-chirurhi, radziej sutykajucca z uskładnieńniami i majuć patrebu ŭ nastupnym dohladzie, čym kali skalpiel vykarystoŭvajuć mužčyny.
Daśledčyki vyvučajuć patencyjnyja pryčyny adroźnieńniaŭ, ale zapisy śviedčać pra toje, što žančyny-chirurhi zvyčajna apierujuć pavolniej i mohuć dasiahnuć lepšych vynikaŭ, bo nie śpiašajucca ŭ apieracyjnaj.
Doktar Krystafier Uolis, jaki kiravaŭ daśledavańniem u balnicy Maŭnt-Sinaj u Taronta, skazaŭ, što vyniki pavinny zaachvocić chirurhaŭ-mužčyn zadumacca pra svoj padychod da chirurhii i vučycca ŭ kaleh-žančyn dziela karyści svaich pacyjentaŭ.
Kamanda Uolisa vyvučyła miedycynskija ŭskładnieńni, paŭtornuju špitalizacyju i ŭzrovień śmiarotnaści paśla apieracyj amal u 1,2 miljona pacyjentaŭ u Antarya ŭ pieryjad z 2007 pa 2019 hod. Zapisy ŭklučali 25 roznych chirurhičnych pracedur na sercy, mozhu, kostkach, orhanach i kryvianosnych sasudach.
Analiz, apublikavany ŭ časopisie Jama Surgery, pakazaŭ, što praz 90 dzion paśla apieracyi ŭ 13,9% pacyjentaŭ, jakich lačyŭ chirurh-mužčyna, naziralisia «niespryjalnyja paślaapieracyjnyja padziei» — usioachopny termin, jaki ŭklučaje śmierć i miedycynskija ŭskładnieńni — ad prablem, jakija patrabujuć dalejšaha chirurhičnaha ŭmiašańnia, da surjoznych infiekcyj, sardečnych prystupaŭ i insultaŭ. Ekvivalentny pakazčyk dla pacyjentaŭ, jakich apieryravali chirurhi-žančyny, skłaŭ 12,5%.
Pacyjenty, jakija trapili da lekaraŭ-žančyn, praz hod paśla apieracyi adčuvali siabie lepš: niespryjalnyja paślaapieracyjnyja padziei naziralisia ŭ 20,7% — u paraŭnańni z 25% pacyjentaŭ, jakich apieravali mužčyny. Kali lekary acanili vyklučna śmiarotnaść paśla apieracyi, roźnica akazałasia jašče bolšaj: u pacyjentaŭ, jakich lačyli chirurhi-mužčyny, imaviernaść pamierci praz hod paśla apieracyi była na 25% vyšejšaja, čym u tych, kaho lačyli chirurhi-žančyny.
Druhoje daśledavańnie 150 tysiač pacyjentaŭ u Šviecyi, taksama apublikavanaje ŭ časopisie Jama Surgery, maluje padobnuju karcinu. Doktar Maj Błom i jaje kalehi z Karalinskaha instytuta ŭ Stakholmie praanalizavali vyniki lačeńnia pacyjentaŭ paśla apieracyi pa vydaleńni žoŭcievaha puzyra. Jany vyjavili, što pacyjenty, jakich lačyli žančyny-chirurhi, pakutavali ad mienšaj kolkaści ŭskładnieńniaŭ i nie tak doŭha lažali ŭ balnicy, čym tyja, kaho lačyli mužčyny.
Žančyny-chirurhi dziejničali pavolniej, čym ich kalehi-mužčyny, i radziej pierachodzili padčas apieracyi ad łaparaskapii da adkrytaj apieracyi.
Błom adznačaje, što, jak i va ŭsich naziralnych daśledavańniach, da vynikaŭ varta stavicca z aściarožnaściu, ale atrymanyja danyja dazvalajuć vykazać zdahadku, što chirurhičnaja technika i schilnaść da ryzyki mohuć častkova rastłumačyć zaŭvažanyja adroźnieńni.
«U niekatorych krainach raspaŭsiudžana mierkavańnie, što chirurhi-mužčyny pieraŭzychodziać chirurhaŭ-žančyn», — kaža Maj Błom. «Cikava, što bolšaść raniej apublikavanych daśledavańniaŭ śviedčyć, što žančyny-chirurhi, prynamsi, takija ž dobryja, jak i mužčyny-chirurhi, abo, jak u pryviedzienym vypadku, navat trochi lepšyja».
Na dumku doktara Uolisa, akramia pryciahnieńnia bolšaj kolkaści žančyn da chirurhii, treba bolš prasoŭvać ich na ŭpłyvovyja pazicyi. «Jość šmat danych, što ŭ nas jość tak zvany «dziravy trubapravod», u vyniku jakoha kolkaść žančyn na kiroŭnych pasadach mienšaje».
U supravadžalnym redakcyjnym artykule prafiesar Marcin Almkvist z univiersiteckaj balnicy Skone ŭ Šviecyi piša:
«Toj fakt, što žančyny-chirurhi pravodzili apieracyi ź mienšaj kolkaściu ŭskładnieńniaŭ, ale rabili heta bolš praciahły čas, dazvalaje vykazać zdahadku, što mantra marskich piechacincaŭ «Pavolna — heta płaŭna, a płaŭna — heta chutka» hetak ža pracuje i ŭ apieracyjnaj».
Niekatoryja lekary źviarnuli ŭvahu i na toje, što daśledavańnie nie biaschibnaje, bo pad uvahu ŭ poŭnaj miery nie prymałasia składanaść vypadku.
Čytajcie taksama:
Vučonyja abviarhajuć mnohija praviły zdarovaha ładu žyćcia, jakija zdavalisia aksijomami
Psichičnyja razłady ŭ baćkoŭ mohuć pavialičyć ryzyku zaŭčasnych rodaŭ — novaje daśledavańnie
Błohier Blišč: «Najvialikšaja duraść, jakuju prydumali milenijały, — vyharańnie». Jamu adkazali
Dzie ŭ Minsku možna zdać leki sa skončanym terminam prydatnaści
