Indyjcy śviatkujuć paśpiachovuju pasadku misii «Čandrajan-3» na Miesiac / Fota: Getty Images
Misija «Čandrajan-3» — pieršy ziamny abjekt, jaki pakinuŭ svaje ślady na paŭdniovym polusie Miesiaca. Šaścikołavy daśledčyk zrabiŭ adkryćcio, važnaje dla stvareńnia budučaha miesca pražyvańnia astranaŭtaŭ na Miesiacy.
Vykarystoŭvajučy łazierny śpiektraskop (LIBS) na borcie miesiacachoda Pragyan, misija Chandrayaan-3 vyjaviła ślady siery na pavierchni kala paŭdniovaha polusa, jak paviedamiła Indyjskaja arhanizacyja kaśmičnych daśledavańniaŭ (ISRO).
Miesiacachod Pragyan, aproč łaziernaha śpiektraskopa, maje renthienaŭski śpiektromietr alfa-čaścic dla vyvučeńnia chimičnaha sastavu miesiacovaj pavierchni, raspaviadaje Gizmodo. Prybor stralaje łaziernymi impulsami, jakija vyparvajuć rehalit (miesiacovy hrunt) u płazmu, a potym aparat analizuje śviatło, što vypramieńvaje płazma. Kožny chimičny elemient u stanie płazmy maje peŭnuju daŭžyniu śvietłavoj chvali, što i dazvalaje raspaznać, jakija elemienty znachodziacca na pavierchni Miesiaca.
Miesiacachod Pragyan zrabiŭ zdymak pasadačnaha aparata Vikram na pavierchni Miesiaca / Fota: ISRO
Miesiacachod taksama vyjaviŭ aluminij, kalcyj, chrom, žaleza, marhaniec, kisłarod, tytan i kremnij, paviedamlaje ISRO. Adnak daśledčykaŭ bolš za ŭsio ŭzrušyła mienavita najaŭnaść siery. Siera — heta chimičny elemient, jaki jość u hlebie, vadzie i raślinach na Ziamli. Jaje prysutnaść na Miesiacy śviedčyć ab najaŭnaści tam vadzianoha lodu. Adpaviedna, najaŭnaść siery i inšych elemientaŭ na paŭdniovym polusie Miesiaca taksama śviedčyć ab tym, što hety rehijon nie taki ŭžo niehaścinny, jak ličyłasia raniej. Taksama ŭpieršyniu byŭ vymierany profil tempieratury paŭdniovaha polusa, kab lepš zrazumieć ciepłavyja pavodziny hetaj vobłaści Miesiaca.
Pośpiech indyjskaj misii «Čandrajan-3», jakaja paśpiachova sieła na Miesiac 23 žniŭnia, zrabiła Indyju čaćviortaj krainaj u historyi, što dasiahnuła takoha vyniku paśla ZŠA, Kitaja i SSSR. Misija pavinna doŭžycca 14 dzion, što ekvivalentna adnamu poŭnamu miesiacovamu dniu.
Paśpiachovaja sproba Indyi vysadzicca na Miesiac, biezumoŭna, zrabiła Indyju adnym z udzielnikaŭ vialikaj miesiacovaj honki, pra jakuju bolš padrabiazna možna pačytać u artykule «Čamu ŭsie sprabujuć prymiesiačycca na paŭdniovym polusie Miesiaca?».
Čytajcie taksama:
Čamu ŭsie sprabujuć prymiesiačycca na paŭdniovym polusie Miesiaca?
