Jahonaja 59-hadovaja žonka-deputatka mieła raman z 19-hadovym chłopcam. Pry hetym jana zabiaśpiečvała jamu datacyi na raźvićcio biznesu.
Piter i Ajrys Robinsany.
Kierk Makkembli.
Brytanskaja presa aktyŭna abmiarkoŭvaje seksualny skandał źviazany z žonkaj pieršaha ministra Paŭnočnaj Irłandyi Pitera Robinsana. Lider partyi demakrataŭ‑iunijanistaŭ zajaviŭ, što pakidaje pasadu pieršaha ministra Paŭnočnaj Irłandyi na paŭtara miesiaca.
U presu pratačylisia źviestki pra toje, što hod tamu 60‑hadovaja misis Robinsan mieła raman z 19‑hadovym Kierkam Makkembli. Pa svaich kanałach jana atrymała dla jaho biespracentavy kredyt u pamiery 50 tysiač funtaŭ sterlinhaŭ na adkryćcio kaviarni. Bolš za toje, 5 tysiač z hetaj sumy jana zabrała sabie ŭ jakaści premii. Kali Robinsan daviedaŭsia pra zdradu svajoj žonki, jana pasprabavała skončyć žyćcio samahubstvam.
Ajrys była deputatam Pałaty hramad Paŭnočnaj Irłandyi. Ciapier jana zajaviła pra skančeńnie palityčnaj karjery praz stan zdaroŭja. Jana narakaje na depresiju.
Sam Piter Robinsan ad pačatku mieŭ padtrymku kalehaŭ i hramadstva, ale ciapier papaŭ pad žorstkuju krytyku ad taho, što nie moh nie viedać pra fakt zdabytaj dla maładziona pazyki, ale ničoha pra toje nie paviedamiŭ, choć kodeks etyki čynoŭnika adnaznačna patrabuje na takija fakty reahavać. Robinsan u svaju čarhu zajaviŭ, što ničoha pra heta nie viedaŭ. Niekatoryja viadomyja paŭnočnairłandskija palityki zaklikali da terminovaj adstaŭki Robinsana. U aŭtorak adbudziecca admysłovaje pasiedžańnie asamblei, na jakim
Robinsanu treba budzie adkazać na pytańni pra jaho datyčnaść da finansavych machinacyj žonki. Vyniki pasiedžańnia vyrašać dalejšy los jahonaj palityčnaj karjory.
Były paluboŭnik misis Robinsan Kierk Makkembli paćvierdziŭ fakt ramana z žonkaj ministra.
Heta nie pieršy skandał seksualnaha charaktaru za apošni čas u Paŭnočnaj Irłandyi. U śniežni 2009 u vyšuk byŭ abjaŭleny i paśla źjaviŭsia z pavinnaj brat lidera paŭnočnairłandskaj respublikanskaj partyi Džery Adamsa. Jon znachodziŭsia ŭ vyšuku ŭ suviazi z padazreńniem u hvałcie ŭ dačynieńni ŭłasnaj dački. Džery Adams pryznaŭsia, što ich pamierły baćka šmat hadoŭ tamu sam praktykavaŭ hvałt nad svaimi dziećmi, što, mahčyma, i paŭpłyvała na pavodziny Liama Adamsa.
U vypadku z Ajrys Robinsan pikantna jašče i toje, što jana stajała na ultrakansiervatyŭnych pazicyjach.Vialiki šum u minułym zrabili jaje hamafobskija zajavy. Ciapier hiej-aktyvisty ŭ sacyjalnaj sietcy Fejsbuk zładzili žartaŭlivuju akcyju ŭšanavańnia Kierka Makkembli: Kirk McKambley Appreciation Society.
