U 2010 hodzie rasijskaja kampanija «Inter RAO JEES» płanuje pastavić u Biełaruś da 5,5 młrd. kVt•hadz elektraenierhii.
Pra heta havorycca ŭ paviedamleńni, apublikavanym na aficyjnym sajcie kampanii.
Jak adznačajecca ŭ pres‑relizie, pamiž «Inter RAO JEES» i kancernam «Biełenerha» dziejničajuć doŭhaterminovyja ŭzajemaźviazanyja dahavory na pastaŭku elektraenierhii i jaje tranzit praź sietki abjadnanaj enierhietyčnaj sistemy (AES) Biełarusi. Pavodle hetych dahavoraŭ u 2010 hodzie kampanija maje namier pastavić u Biełaruś 3 młrd. kVt•hadz elektraenierhii ŭ adpaviednaści z bałansam Sajuznaj dziaržavy i da 2,5 młrd. kVt•hadz elektraenierhii — «na asnovie pryncypaŭ kamiercyjnaj metazhodnaści».
U 2010 hodzie taksama płanujecca ažyćciaŭlać tranzitnyja pastaŭki, u tym liku praź sietki AES Biełarusi, u Kalininhradskuju enierhasistemu i krainy Bałtyi. U 2009 hodzie ŭ krainy Bałtyi było pastaŭlena 1,1 młrd. kVt•hadz elektraenierhii.
Umovy tranzitu, nahadajem, abmiarkoŭvajucca siońnia na pieramovach u Minsku.
Pres‑słužba kampanii adznačaje, što ŭ kancy minułaha hoda ŭ Biełaruś byli nakiravanyja prapanovy pa taryfie na tranzit i canie pastavak elektraenierhii ŭ Biełaruś na 2010 hod, «sfarmiravanyja z ulikam pryncypu ich praparcyjanalnaha źmianieńnia ŭ ramkach doŭhaterminovych dahavoraŭ».
«Prapanovy AAT «Inter RAO JEES», — padkreślivajecca ŭ paviedamleńni, — zasnavanyja na vykanańni intaresaŭ kožnaha z bakoŭ i majuć na ŭvazie kampiensacyju zatrat biełaruskamu boku z ulikam pavieličeńnia abjomu tranzitu elektraenierhii cieraz terytoryju Biełarusi i zaćvierdžanych taryfna‑bałansavych rašeńniaŭ Fiederalnaj słužby pa taryfach Rasii. Jany nieadnarazova abmiarkoŭvalisia ź biełaruskimi kalehami, što zafiksavana pratakołami dvuchbakovych pieramoŭ».
Patrabavańnie «Biełenerha» ab kratnym pavieličeńni koštu tranzitu, adznačajuć u kampanii, «nie adpaviadaje duchu padpisanych raniej doŭhaterminovych pahadnieńniaŭ i schiemie ŭzajemadziejańnia «Inter RAO JEES» i «Biełenerha», jakaja realizujecca na miždziaržaŭnym uzroŭni i ŭ ramkach paliŭna‑enierhietyčnaha bałansu Sajuznaj dziaržavy».
«Inter RAO JEES» raźličvaje, što «pieramovy buduć nasić kanstruktyŭny charaktar i prachodzić u farmacie ŭzvažanaha dyjałohu, jaki dazvolić u karotkija terminy znajści ŭzajemaprymalnaje rašeńnie», padkreślivajecca ŭ pres‑relizie.
AAT «Inter RAO JEES» — elektraenierhietyčnaja kampanija, jakaja kantraluje šerah hienierujučych i raźmierkavalnych enierhietyčnych aktyvaŭ u Rasii i za miažoj. Sumarnaja ŭstanoŭlenaja mahutnaść elektrastancyj, što znachodziacca va ŭłasnaści i pad kiravańniem kampanii, składaje kala 18.000 MVt. Kampanija viadzie aktyŭnuju inviestycyjnuju dziejnaść, zajmaje viadučyja pazicyi ŭ Rasii ŭ śfiery ekspartu‑impartu elektraenierhii.
Maryna Nosava, BiełaPAN.
