Jak udałosia vyznačyć paśla praviedzienych ekśpiertyz, znojdzienaje cieła naležała 24-hadovamu ŭradžencu Žłobinskaha rajona, jaki źnik bieź viestak čverć stahodździa tamu.
Niezadoŭha pierad źniknieńniem chłopiec jakraz adbyŭ «chimiju» za «vykradzieny na pradpryjemstvie kabiel». U červieni 1998-ha jon naviedaŭ svaich svajakoŭ u Žłobinie i Minsku i padzialiŭsia ź imi płanami na najbližejšuju budučyniu. Jany byli źviazanyja z prodažam malinaŭ u Maskvie, dla čaho mužčyna pazyčyŭ hrošaj na zakupku jahad u svaich siaścior. Paśla taho jaho nichto nie čuŭ i nie bačyŭ.
Paśla znachodžańnia na padvorku ŭ Vietkaŭskim rajonie pareštkaŭ cieła i vyjaŭleńnia, što śmierć čałavieka była hvałtoŭnaj, Śledčy kamitet raspačaŭ kryminalnuju spravu pa fakcie zabojstva. Pašukaŭšy, chto ŭ hetym domie žyŭ raniej, adrazu vyjšli na śled uradženca Rasii, jaki vałodaŭ nieruchomaściu ź siaredziny 1990-ch da listapada 1998 hoda.
Vyśvietliłasia, što paśla prodažu hetaha doma mužčyna pierajechaŭ da baćkoŭ u Homielski rajon, dzie «sistematyčna źbivaŭ maci» i «sychodziŭ u zapoi». Za hetaje rukaprykładstva jon trapiŭ pad śledstva, źbieh u Rasiju, dzie ŭ 2007 hodzie pamior.
«Praviedzienaja karpatlivaja praca pa ŭstanaŭleńni nievidavočnaj suviazi pamiž zahinułym i hetym žycharom Homielskaha rajona. Zdabytyja źviestki, što abodva niekatory čas vykonvali roznyja vidy rabot na adnym pradpryjemstvie — AAT «Homielskaja rajsielhaschimija».
Na pakazanaj siostram zahinułaha fatahrafii padazravanaha jany paznali naparnika brata pa «jahadnym biznesie», apisali jaho aŭtamabil. Ustanoŭleny i inšyja śviedki ich znajomstva», — raskazali padrabiaznaści ŭ SK.
U vyniku śledstva pryjšło da vysnovy, što ŭ zabojstvie maładoha chłopca byŭ jakraz i vinavaty hety čałaviek. Pavodle pakazańniaŭ śviedkaŭ, abodva mužčyny, budučy ŭ stanie ałkaholnaha apjanieńnia, byli schilnyja da «vybuchaŭ biespadstaŭnaj ahresii».
Pavodle viersii śledstva, mužčyny «razyšlisia ŭ pohladach na supolny handal jahadami», i ŭ prystupie hnievu adzin ź ich zabiŭ druhoha. Paśla taho mužčyna zakapaŭ cieła niebaraki ŭ dvary i nieŭzabavie vystaviŭ dom na prodaž. Cikava, što, pradajučy dom, mužčyna skazaŭ kupcam, što na dvarovaj terytoryi «zakapany zdochły koń».
U suviazi sa śmierciu hałoŭnaha padazravanaha kryminalnaja sprava była spynienaja.
Čytajcie taksama:
U Mahilovie raskryli rezanansnaje zabojstva 11-hadovaj dziaŭčynki, što adbyłosia 25 hadoŭ tamu
Raskryli zabojstva kasirki minskaha abmieńnika 14-hadovaj daŭniny
Pareštki minskaha biznesmiena znajšli praz 25 hadoŭ paśla jaho źniknieńnia
