Ilustracyjnaje fota «Naša Niva»
Krainy ES užo druhi hod zapar zaviaršajuć aciaplalny siezon z rekordnymi zapasami hazu. Miž tym, pastaŭki «Hazprama» ŭ Jeŭropu ŭpali bolš čym u piać razoŭ u paraŭnańni z davajennym uzroŭniem, piša The Moscow Times.
Aciaplalny siezon u ES skončyŭsia 31 sakavika, i zapasy ŭ schoviščach skłali, pa źviestkach Gas Infrastructure Europe, 58,7%. Heta maksimalny abjom u historyi — vyšej, čym hod tamu, kali jeŭrapiejcy, napałochanyja adklučeńniem rasijskaha hazu, rezka skaracili jaho vykarystańnie jak u pramysłovaści, tak i na spažyvieckim uzroŭni.
Spravicca z mahčymym deficytam dapamahli dźvie ciopłyja zimy i radykalnaja pierabudova sistemy zabieśpiačeńnia.
Zvadkavany pryrodny haz staŭ hałoŭnaj krynicaj prapanovy, abahnaŭšy trubapravodny, a hałoŭnym pastaŭščykom, jaki źmianiŭ Rasiju, — ZŠA: ciapier jany zabiaśpiečvajuć amal pałovu jeŭrapiejskaha impartu ZPH suprać prykładna čverci da pačatku vajny.
Pastaŭki ž u Jeŭropu ŭ «Hazprama» skłali ŭ minułym hodzie 28 młrd kub (na ŭzroŭni druhoj pałovy 1970-ch hh.) suprać bolš za 150 młrd kubamietraŭ u davajennym 2021 h.
Ź piaci trubapravodaŭ haz u Jeŭropu zaraz pampujecca tolki pa dvuch.
Pry hetym u lutym ministr enierhietyki Aŭstryi Leanor Hievieśler zajaviła, što kraina, čyj hazavy impart bolš jak na try čverci zabiaśpiečvaje Rasija, razhladaje mahčymaść razryvu kantrakta z «Hazpramam». A ŭ vypadku realizacyi namieru Ukrainy admovicca ad padaŭžeńnia z 2025 h. damovy na tranzit pakinie «Hazprom» z adnoj pracujučaj truboj — u paŭdniovuju Jeŭropu praz Turcyju.
Z samaha vostraha momantu enierhietyčnaha kryzisu haz u ES patańnieŭ amal u 14 razoŭ.
Košt fjučarsa Dutch TTF, jaki ŭ žniŭni 2022 h. na piku pieravysiŭ 340 jeŭra/MVt.h (bolš za $3600 za 1000 kubamietraŭ), z pačatku lutaha hetaha hoda vahajecca vakoł adznaki 25 jeŭra ($285).
Čytajcie taksama:
Jeŭrasajuz zajaviŭ, što spynić tranzit rasijskaha hazu praz Ukrainu
Šviecyja spyniła rasśledavańnie pa spravie ab vybuchach na «Paŭnočnych patokach»
Biełaruskija ŭłady spadziajucca kuplać rasijski haz jašče tańniej paśla 2026 hoda
