Bi ahientaŭ! — Ratuj apazicyju! 195

Lider «Maładoha fronta» Źmicier Daškievič rezka adkazvaje Zianonu Paźniaku i Siarhieju Kalakinu.

Ciažka, ciažka adbivajucca na apazycyi 16 hod znachodžańnia ŭ rezervacyi. Adsutnaść vynikaŭ pracy stanovicca pryčynaju apatyi dy biaźvierja. Apatyja dy biaźvierje stanovicca pryčynaju adsutnaści vynikaŭ. I voś kab niejak chacia patłumačyć hetuju biezvynikovaść, apazycyja pačynaje šukać źniešnija pryčyny.

Heta vielmi dobry pryjom, kab apraŭdacca ci zabycca (-ić) na pryčyny ŭnutranyja.

Najbolš dasiahnuŭ u pošuku źniešnich pryčynaŭ našaha ahulnabiełaruskaha stanovišča, kaniešnie, Zianon Paźniak. Jahonyja pasažy pra «Łubianku», «vikaŭskuju/padstaŭnuju/antybiełaruskuju/marhinalnuju apazycyju», «namienkłaturščykaŭ» i «kantorščykaŭ», «ahientaŭ FSB/KDB» i «funkcyjaneraŭ» hetych specsłužbaŭ, užo stalisia zvyčajnymi.

U zasnavalnika biełaruskaha apazycyjnaha słenhu, pa-pieršaje, stan rezervacyjny nakładajecca na stan emihracyjny. A pa-druhoje,

dla Zianona Paźniaka, fatazdymak jakoha na adnajmiennym sajcie staić u šerahu Vitaŭta, Kalinoŭskaha i Bykava, pahadzicca z tym, što bieź jaho, sučasnaha «Vitaŭta» i «Kalinoŭskaha» mažliva baraćba za biełaruskuju movu, nacyjanalnyja kaštoŭnaści, niezaležnaść dy demakratyju — i absurdna, i dzika, i navat strašna. Tamu, što raz paśla čarhovaha Sojmu Partyi KCHP-BNF, my možam čytać faksy Paźniaka ź pieralikam novych i novych imionaŭ ahientury.

Nia tak daŭno šyrokaje abmierkavańnie atrymali dadzienyja śledčaha adziełu KCHP-BNF ab apošnich źmienach u «vikaŭskaj apazycyi»: «Pieršaje, što zdaryłasia ŭ vikaŭskaj apazycyi — heta zamiena kadraŭ padstaŭnych, kirujemych i łajalnych na niepasrednych funkcyjanieraŭ KDB. Pierastanoŭki adbylisia amal va ŭsich hramadzkich i palityčnych arhanizacyjach.

Kančatkova zachoplena «Baćkaŭščyna» (ciapier zastałosia tolki abjadnać jaje z «Radzimaj»). Prytym takija maścityja biełaruskija intelihienty, takija važnyja akademiki, mastaki, dziejačy kultury pry svajoj poŭnaj niazdolnaści da hramadzkaj arhanizacyjnaj pracy navat, vyhladaje, niezrazumieli, što nasamreč adbyłosia.

Jany, bačycie, palitykaj nie zajmajucca. Tamu para dziaŭčynak-kantorščyc ich usich elehantna pastroiła, uznačaliła i pakinuła zadavolenymi svajoj biezadkaznaściu." (Zianon Paźniak: «Źmiest prapahandy i sutnaść padziej»). Nia viedaju, płakać ci radavacca kiraŭnicam biełaruskaje dyjaspary — Alenie Makoŭskaj i Ninie Šydłoŭskaj z nahody hetkich vykryvalnickich śviedčańniaŭ ichniaha ž padnačalenaha — emihranta Zianona Paźniaka, ale hanarycca jość čym adnaznačna. Heta ž utvaryć takoje! — abduračyć usiu «maścituju» biełaruskuju intelehiencyju! Spadziavacca tut možna chiba na toje, što maścityja intelehienty nie čytajuć faksaŭ-adozvaŭ sučasnaha «Vitaŭta» da biełaruskaha narodu. Niachaj chacia b niechta zachavaje iluzii ab adekvatnym Zianonu Paźniaku, «laciaščam na kryłach nočy/parašucie NATO».

A dla tych chto čytaje, praciahniem! Bo raźviazka padziejaŭ prosta detektyŭnaja! Idziem pa tekście: «Kali ŭ hramadzkim sektary heboŭskaja rearhanizacyja supravadžałasia infantylnaj kamedyjaj, to ŭ palityčnaj apazycyi ŭsio vyhladała tupym farsam. Asabliva pakazalnym atrymaŭsia «prahmatyčny» kaniec «novaj chvali», jakuju ŭznačaliŭ kadravy maładzion — Janukievič.

Niadaŭna hrupa kiraŭnictva našaj Partyi (KCHP-BNF) vypadkova «zastukała» hetaha chłapca ŭ čas kantaktu jaho z funkcyjanerami specsłužbaŭ. Voś heta byŭ pasaž!».

Jak vam heta ŭsio?! Jaki razmach dumki! Jakija adtočanyja vysłoŭi! Jakoje mastactva słova! Jakoje viedańnie prafesyjnaj leksyki! — «dziaŭčynki-kantorščycy», «niepasrednyja funkcyjanery KDB», «maścityja biełaruskija intelihienty», «heboŭskaja rearhanizacyja», «infaltylnaja kamedyja», «kadravy maładzion»! Nie, heta nie čytać treba, heta treba śpiavać!

Škada, kaniešnie, Alaksieja Janukieviča, jaki pa hłupaści papaliŭsia pierad takimi maścitymi śledčymi! A spaliŭsia ahient, jak vynikaje z pakajalnaha tłumačeńnia, na roŭnym miescy. Paśla akcyi «Dziady», što tradycyjna ładziłasia ŭ listapadzie minułaha hodu, da Alaksieja i dvuch jahonych adnapartyjcaŭ padyšli AMAPaŭcy z zahadam zharnuć nacyjanalny ściah. I jak tolki lider Partyi BNF pačaŭ davać tłumačeńni milicejskamu načalstvu naśpieła opier-bryhada Partyi KCHP-BNF, jakaja z vokličami: «Aha! Zapalili!» nakinułasia na kadravaha maładziona z novaj chvali. Naturalna, što z hetaha ahienturnaha pravału astatnim kadravikam treba rabić vysnovy, udaskanalvajučy techniku kanśpiracyi.

Dalej žarści tolki ŭzrastajuć, i, jak śviedčyć Zianon Paźniak, «Łubianka pačała artpadrychtoŭku, dała załp systemy «Hrad»! […] 5 i 6-ha śniežnia schapili pa čarzie dvuch apazycyjnych maładzionaŭ, zapichnuli ŭ mašyny, vyvieźli daloka za horad i vykinuli ŭ lesie. Namenklaturnyja maładziony ad «apazycyi» viarnulisia ŭ Miensk i pačali davać interviju. Kaniešnie, jak Paźniak moh abyści praciah pracy eskadronaŭ śmierci? Tym bolš, što Zianon niebiespadstaŭna pierakanany, što na vyvaz u les u Biełarusi dadziena raznaradka tolki na jaho samoha. Ab hetym paŭsiul zajaŭlajecca navat i ciapier: «Toj eskadron, jaki stvaryli, pieršym pavinien być ja». A heta ŭžo jak pa savieckaj kłasicy: «Na jahonym miescy pavinien być ja! — Pryjedzieš, budzieš!»

Nie pakinuŭ ubaku Paźniak navat Tacianu Šapućku, jakoj u tym samym słaŭnym 1996 hodzie, kali Paźniak pamiž ahientaŭ KDB, FSB i inšaj navałačču pakidaŭ Baćkaŭščynu, było tolki šeść hodzikaŭ. I heta ž treba da čaho dajšło! — nia tolki padrasła za hetyja 15 hadkoŭ, ale jašče ž i biełaruskuju movu niedzie vyvučyła! I, hlań ty, razmaŭlać na joj navučyła pałovu škoły i jurfaku! Adnak spraktykavanaha na adozvach čytača adrazu pačnuć «ciarzać smutnyja sumnieńni» — a ci mažliva toje biez Paźniaka i dapamohi KHB?!

Adkaz rašučy, zrazumieły i adnaznačny! — nie, niemažliva! I tamu ćviordaja ruka śledčaha praciahvaje: «Da hetaha ž farsavaha łubianskaha prajekcika ŭmieła padklučyli spravu studentki Tani Šapućki. Tut, praŭda, razyhrali daskanała, jak pa notach. Miłuju studentku zaprasili ŭ Brusel na Forum hramadzianskaj supolnaści prahramy «Uschodniaha Partniorstva» (dzie ź joj sfatahrafavalisia Karł Bilt i Benita Valdner), a pa viartańni ŭ Miensk jana była hruba adličanaja z universitetu za propusk zaniatkaŭ. Skandał. Sami ž łubianskija prajektanty prainfarmavali pra heta Brusel. I voś užo Karł Bilt, ministar zamiežnych spravaŭ Švecyi, — krainy, jakaja ciapier staršyniuje ŭ Eŭraźviazie, — padniaŭ svoj hołas u abaronu Šapućki. Nastupny vystupiŭ ministar MZS Estonii Urmas Paet, jaki zajaviŭ, što «Estonija budzie sačyć za losam Šapućki. Słovam, mašyna zakruciłasia, Łubianka adpačyvaje».

Tut možna dadać tolki toje, što Łubianka i sapraŭdy adpačyvaje, jak i ŭsie prapahandysty biełaruskaha režymu.

U pryncypie, kab u apošnich było da nizaści i nianaviści chacia b trošku mazhoŭ, jany b pisaninu Zianona Stanisłavaviča ŭziali na ŭzbrajeńnie najpierš. Tut i vydumlać ničoha nia treba, i vymyzhvacca samim.

I ŭžo jak by padvodziačy vynik śledčaj dziejnaści Zianon Paźniak, u svajoj apošniaj adoźvie da Sojmu partyi KCHP-BNF i biełaruskaha narodu robić kančatkovuju kłasifikacyju «marhinalnaj vikaŭskaj apazycyi»: «Źviartaju Vašu ŭvahu na toje, jak vyrazna raźmierkavałasia ciapier vikaŭskaja marhinalnaja apazycyja paśla źmieny eŭrapiejskaj palityki. Častka (ź Milinkievičam) pajšła na kalabaracyju z režymam, padtrymaŭšy eŭrapiejski prahmatyzm, inšaja častka (AHP, Labiedźki, Ramančuki) znoŭ skiravalisia na Maskvu; treciaja častka i maładziovaje asiarodździe trapiła ŭ jašče bolšuju (časam u niepasrednuju) zaležnaść ad KHB, jahonych pravakacyjaŭ i avanturaŭ." Voś, adbyłosia! Usie ŭ zbory! Ad kalabaranta Milinkieviča da apošniaha kadravaha i namenklaturnaha maładziona. Adna nadzieja, što kaliś, adpaviedna ź bijałahičnymi zakonami, Łukašenka pamre i tady Baćkaŭščyna sustrenie svajho «Vitaŭta», katory razhonić usiu hetuju vikaŭskuju chieŭru i naviadzie paradak!

Kali ž niechta, pračytaŭšy vytrymki z daśje Zianona Paźniaka, padumaje, što taki charaktar palityčnaje vyviedki ŭłaścivy tolki Paźniaku, śpiašajusia Vas abnadzieić. Nie, nia tolki Paźniak pramyšlaje vykryvalnictvam. Na ŭzbrajeńni takija metady stajać jak u idealahičnych vorahaŭ Paźniaka — kamunistaŭ/spraviadlivaśvietaŭcaŭ Siarhieja Kalakina, tak i ŭ byłych adnapartyjcaŭ — Lavona Barščeŭskaha.

Pieršy napačatku vykryvaŭ kiravany specsłužbami «Małady Front», jaki, parušyŭšy ŭsie dohmy Siarhieja Ivanaviča, vyjšaŭ sa składu «ADS»: «Na moj pohlad, jany niesamastojna prymali hetaje rašeńnie, im niechta padkazaŭ heta zrabić. Heta daŭno marać zrabić specsłužby Biełarusi», ciapier vykryvaje ŭ hetym užo ŭvieś «Biełaruski niezaležnicki blok»: «Ja liču, što heta praca, u tym liku i ahientaŭ upłyvu sa śpiejcsłužbaŭ, ukaranionnych u apazycyju». A druhi akreśliŭ hety samy «BNB» nie inakš, jak «manifestam kalabaranctva». Jak bačym — roznyja partyi, roznyja palityki, a padychody da žyćcia adny i tyja ž.

Nu, što tut papišaš,

padrastajučamu pakaleńniu sapraŭdy jość u kaho vučycca.

P. S. Jość u bratoŭ našych słavianskich dobry lozunh, jaki tłumačyć usie biedy i niaščaści «Ivanuški-duračka»: «Biej žydoŭ! — Ratuj Rasieju!» Peŭna pryśpieŭ čas i biełaruskaj apazycyi skancentravacca na iścinnaj, idejnaj i kankretnaj dziejnaści, uziaŭšy na ŭzbrajeńnie lozunh: «Biej ahientaŭ! — Ratuj apazycyju!». A pakul, pakul niachaj kiruje ŭsimi nami ćviordaja i niepachisnaja ruka haranta trojčy źmienienaj Kanstytucyi.

Pavodle mfront.net, skaročana

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH