Pa vynikach apracoŭki 99,91% elektronnych pratakołaŭ pieršaje miesca ŭ druhim tury prezidenckich vybaraŭ va Ukrainie zaniaŭ 59-hadovy lider apazicyjnaj Partyi rehijonaŭ, były premjer-ministr Viktar Janukovič.
Pavodle papiarednich źviestak, Janukovič nabraŭ 48,95% hałasoŭ vybarščykaŭ. U jaho sapiernicy, 49-hadovaj Julii Cimašenki, jakaja źjaŭlajecca kiraŭnikom urada, 45,48% hałasoŭ. Suprać usich prahałasavała 4,36% hramadzian. 1,21% biuleteniaŭ pryznanyja niesapraŭdnymi. Jaŭka skłała 69,15%.
Na vybarčych učastkach u Minsku i Breście pieramoh Janukovič, jaki nabraŭ adpaviedna 63,51% i 65,9% hałasoŭ. Cimašenka atrymała 31,18% i 30,95% hałasoŭ. U cełym u zamiežnaj akruzie (113 učastkaŭ u 76 krainach) pieramahła premjer-ministr — 60,57%, lider apazicyi nabraŭ 33,96%. U pieršym tury vyjhraŭ Janukovič (29,57% suprać 23,24%).
Misii mižnarodnych naziralnikaŭ va Ukrainie pryznali vybary ŭ cełym svabodnymi i demakratyčnymi, ukazaŭšy na šerah parušeńniaŭ na vybarčych učastkach, prabieły ŭ zakanadaŭčaj bazie, a taksama na niepažadanaść nadalej mianiać zakon ab vybarach prezidenta ŭ pieryjad pamiž pieršym i druhim turami.
8 lutaha na pres-kanfierencyi ŭ Kijevie namieśnik staršyni Partyi rehijonaŭ Hanna Hierman nazvała pryznańnie vybaraŭ z boku ABSIE «važniejšaj padziejaj».
«Uvieś śviet pryznaje, što heta pieramoha Janukoviča na sumlennych i prazrystych vybarach», — skazała Hierman.
Jana vykazała nadzieju, što Julija Cimašenka «jak demakratyčny, a nie aŭtarytarny palityk» pryznaje svajo paražeńnie i pojdzie ŭ adstaŭku.
Sama Cimašenka ŭ paniadziełak svaju pazicyju publična nie vykazała. Jaje pres-kanfierencyja anansavałasia spačatku na 13.00, a zatym na 17.00, ale ŭ vyniku była pieraniesienaja na 9 lutaha biez ŭkazańnia času.
7 lutaha, kamientujučy ŭ svaim pres-centry vyniki ekzit-połaŭ, zhodna ź jakimi pieramoh Janukovič z adryvam 2,8—5,1% (kančatkovyja źviestki), Cimašenka zajaviła, što heta znachodzicca ŭ miežach statystyčnaj pahrešnaści i niejkija vysnovy možna rabić tolki paśla poŭnaha padliku hałasoŭ.
Na dumku šerahu biełaruskich palitołahaŭ, adnosiny Minska i Kijeva zastanucca raniejšymi niezaležna ad taho, chto stanie prezidentam Ukrainy.
