U prodažy źjaviłasia aficyjnaja viersija filmu «Savieckaja historyja» («The Soviet story») ź biełaruskimi subtytrami. Film raspaviadaje pra złačynstvy savieckaha režymu,
vykarystoŭvajučy ŭnikalnyja archiŭnyja materyjały i intervju z udzielnikami padziejaŭ.
Tematyka filmu zakranaje Haładamor va Ukrainie, masavyja rastreły ŭ Katyni, savieckuju padtrymku nacysckaha režymu, masavyja departacyi i miedyčnyja ekpierymienty ŭ HUŁAHu.
Film łatvijskaha režysiora Edvinsa Šnore ŭžo byŭ pakazany pa telebačańni ŭ dziesiaci krainach, u tym liku ŭ Estonii, Łatvii, Litvie, Hruzii, Słavienii, Ispanii, Šviecyi, Ukrainie, ZŠA. Biełaruskija hledačy mieli mahčymaść prahladu filma na spadarožnikavym kanale «Biełsat» 4 lipienia 2009 h.
Adrazu ž paśla premjery ŭ Jeŭrapiejskim Parłamiencie ŭ krasaviku 2008 h. «Savieckaja historyja» vyklikała burnyja pratesty z boku Rasii i padkantrolnych Kramlu arhanizacyjaŭ i ŚMI. Navat viadučyja rasijskija ŚMI rezka krytykavali film, da siońniašniaha dniu jaho nie pakazali pa rasijskim telebačańni. Usio heta kaža pra toje, nakolki balučaja dla rasijskaj ułady i hramadstva praŭda pra kryvavyja złačynstvy savieckaj sistemy, jakaja ŭsio jašče zastajecca nieviadomaj i masavamu biełaruskamu hledaču.
Infarmacyja pra mahčymaść nabyćcia filma jość na staroncy sovietstory.com.
Infarmacyja pra film:
Typ: Dakumientalny film
Praciahłaść: 85 chv.
Mova: anhlijskaja (subtytry na 30 movach, u tym liku na biełaruskaj)
Huk: sterea
Data vychadu: 2008
Kraina: Łatvija
Režysior i scenaryst: Edvins Šnore (Edvīns Šnore)
