Paśla zakrytaj narady kalehija Ekanamičnaha sudu SND pastanaviła pryniać da vytvorčaści pazoŭ aficyjnaha Miensku da Rasiei ab skasavańni rasiejskaha myta na naftapradukty, jakija pastupajuć u Biełaruś.
Ciapier kalehija sudu ciaham 30 dzion praviadzie rasparadčaje pasiadžeńnie, na jakim vyrašyć pytańni, źviazanyja z padrychtoŭkaj spravy da razhladu. Paśla hetaha budzie pryznačana data sudovaha raźbiralnictva. Pakul nichto ŭ sudzie nia moža skazać dakładna, kolki praciahniecca praces. Padčas padrychtoŭki spravy dla razhladu baki pavinny padać dadatkovyja dakumenty.
Kalehija sudu vyznačyła, što, da prykładu, biełaruski bok pavinien padać u sud kopiju adkazu premjer-ministra Rasiei Ŭładzimiera Pucina na list biełaruskaha premjera Siarhieja Sidorskaha ad 30 studzienia hetaha hodu. A taksama kopiju lista vice-premjera Rasiei Ihara Siečyna ad 1 sakavika hetaha hodu. Rasiejski ŭrad pavinien padać u sud infarmacyju pra paradak raźmierkavańnia ŭ biudžety abiedźviuch krainaŭ ekspartnaha myta, jakoje biarecca z pradukcyi, jakaja vyrablajecca ŭ Biełarusi z rasiejskaj syraviny.
Sudździa-dakładčyk pa spravie Sabit Žałdybajeŭ, jaki pradstaŭlaje Kazachstan, adznačyŭ, što aficyjny Miensk prosić Ekanamičny sud kanstatavać fakt parušeńnia Rasiejaj mižnarodnych abaviazacielstvaŭ:
«Aproč hetaha zajaŭnik prosić, kab sud rekamendavaŭ Rasiei pryniać miery pa admienie vyvaznoha myta na naftapradukty, jakija vyvoziacca z terytoryi Rasiei ŭ Biełaruś».
Narada kalehii sudu była zakrytaj i praciahvałasia bolš za dźvie hadziny. Pasiadžeńnie vioŭ staršynia sudu Fajzuło Abdułojeŭ (sudździa ad Tadžykistanu)
