Karystalniki «Tviteru» padličyli, što kali skłaści ličby dat kožnych vybaraŭ prezidenta, atrymajecca 21. Jeŭraradyjo pacikaviłasia ŭ numarołaha, ci vypadkova takoje supadzieńnie.
Pieršyja vybary byli [druhi tur -- NN] 10.07.94 — 1+7+9+4=21, potym 09.09.2001 — 9+9+2+1=21, apošnija 19.03.2006 — 1+9+3+2+6=21.
Nastupnyja vybary, pavodle słovaŭ Lidzii Jarmošynaj, mohuć prajści 6 lutaha 2011 hoda. A heta taksama 21! (6+2+2+11).
Niahledziačy na toje, što ŭ padobnych padlikach mohuć być i roznyja chiby, Jeŭraradyjo vyrašyła pacikavicca, nakolki važnyja ličby ŭ našym žyćci.
Numarołah Mikałaj Sadocha kaža, što ličba niasie šmat infarmacyi, tamu heta nie vypadkova. Ličba moža navat upłyvać na myśleńnie. I kab paŭpłyvać, nieabchodna prosta padbirać patrebnuju datu.
«21 — heta lusterka 12, a 12 — heta śviet. Toje, što prajaŭlajecca paśla niejkaj padziei. Taksama 21 — heta vopytny psichołah, jaki viedaje, jakija nitački paciahnuć, kab atrymać vynik. Niechta pracuje i padbiraje nie vypadkova, dla niekaha 21 daje dobry vynik».
Kali ž raskrucić ličbu 21 pavodle kaśmičnaha zakonu Alfy i Amiehi, atrymajem na druhim uzroŭni 11, a heta značyć pavarot. A voś kudy ŭsio paviernie, zaležyć ad ustalovak!
«Kudy što paviernie — usio zaležyć ad taho, ź jakich metavych ŭstalovak prachodziać vybary. Ci heta budzie bolš śviatła ŭ rozumach ludziej, tady jany vybieruć kandydata, jaki bolš padychodzić. Kali niešta inšaje, to pryviadzie da niehatyŭnaha».
A kali razhledzieć ličbu 21 u inšym rakursie, jak «dvaccać adzin», to «dvaccać» — heta buduć ludzi, jakija pryjšli na vybary. A voś «adzin» značyć, što jany musiać vybrać adzinaha kandydata.
«Ludzi pryjšli pabačyć adzinaha, jakoha jany pavinny abrać».
Mahčyma, tamu našaja apazicyja nie pieramahaje na vybarach, bo štohod nie moža abrać adzinaha kandydata?
Toje, što daty vybaraŭ abirajucca nie vypadkova, paćvierdziŭ i Mikałaj Łazavik. Ale, zhodna ź jahonymi słovami, heta źviazana ź inšymi faktarami.
«Daty pryznačajucca nievypadkova, ale jakraz nie biarucca pad uvahu niejkija kabalistyčnyja ličby, 21, 13, 666. Pry vyznačeńni daty vybaraŭ — jak praviła, voś prezident raicca, kali pryznačaje miascovyja i parłamienckija vybary: kab byŭ zručny čas pa pieryjadzie sielhasprac, supadzieńnie ŭličvajecca relihijnych i dziaržaŭnych śviataŭ, pieryjad mienšaj kolkaści adpačynkaŭ. Ale ni ŭ jakim razie nie kabalistyka».
Ličba 21 ščaślivaja i dla karciožnikaŭ. Bo ŭ «Błek Džek», ci ruskim anałahu «Ačko», dvaccać adno — heta vyjhryšnaja kambinacyja.
Darečy, kali kiravacca takoj «ličbavaj łohikaj», to prezidenckija vybary mohuć adbycca ŭžo sioleta. Naprykład, 7 listapada (7+11+2+1). Heta akurat niadziela.
