Sioleta abituryjentaŭ u Biełarusi buduć prymać 55 vyšejšych navučalnych ustanoŭ: 45 — dziaržaŭnaj formy ŭłasnaści i 10 — pryvatnaj. Pra heta na tradycyjnaj naradzie adkaznych sakrataroŭ pryjomnych kamisij VNU 14 maja ŭ Minsku paviedamiŭ pieršy namieśnik ministra adukacyi Alaksandr Žuk.
Pavodle jaho słoŭ, sioleta ŭkazami prezidenta stvorany dźvie novyja VNU. Tak, stvorany Instytut pahraničnaj słužby Biełarusi, a Mahiloŭski kaledž Ministerstva ŭnutranych spraŭ Biełarusi pierajmienavany ŭ vyšejšy kaledž i ŭpieršyniu pačnie padrychtoŭku kursantaŭ z vyšejšaj adukacyjaj — 100 čałaviek na dzionnaj formie navučańnia i 100 čałaviek — na zavočnaj.
Žuk taksama adznačyŭ, što biełaruskija VNU »ščylna padyjšli da ŭkaranieńnia sistemy mieniedžmientu jakaści» (ŚMIA), asobnyja ź ich prajšli siertyfikacyju i atrymali siertyfikaty adpaviednaści svaich ŚMIA patrabavańniam standarta STB ISO 9001‑2009. Heta Biełaruski dziaržaŭny technałahičny univiersitet, Biełaruska‑Rasijski univiersitet, Kamandna‑inžynierny instytut MNS, Hrodzienski dziaržaŭny univiersitet imia Janki Kupały, Biełaruski dziaržaŭny ekanamičny univiersitet.
Pavodle słoŭ Žuka, sioleta ŭ Ahulnadziaržaŭny kłasifikatar Biełarusi ŭniesieny dźvie novyja śpiecyjalnaści: «Aerakaśmičnyja radyjoelektronnyja i infarmacyjnyja sistemy i technałohii» i «Prykładnaja infarmatyka». Padrychtoŭka kadraŭ pa hetych śpiecyjalnaściach pačniecca ŭ Biełaruskim dziaržaŭnym univiersitecie. Akramia taho, šerah vyšejšych navučalnych ustanoŭ pačnie padrychtoŭku kadraŭ pa novych dla ich śpiecyjalnaściach: Biełaruski nacyjanalny techničny univiersitet — pa śpiecyjalnaści «Hieadezija», Biełaruski dziaržaŭny univiersitet infarmatyki i radyjoelektroniki — «Elektronnyja sistemy biaśpieki», Połacki dziaržaŭny univiersitet — «Aŭtamabilnyja darohi», «Elektrazabieśpiačeńnie» i inšych.
Nahadajem, u 2010 hodzie ŭ dziaržaŭnyja i pryvatnyja VNU Biełarusi na ŭsie formy atrymańnia adukacyi zapłanavana pryniać 102,7 tys. čałaviek, što na 4,9 tys. bolš, čym u 2009 hodzie.
