U Krakavie razharajecca skandał: pobač z zamkam Vaviel, dzie pachavanyja pareštki zahinułaha ŭ avijakatastrofie prezidenta Polščy Lecha Kačynskaha, źjaviłasia hihanckaja piŭnaja rekłama, jakaja abviaščaje: «Nie chapaje uražańniaŭ? Patrebny „Chałodny Lech!“». Palityki aburajucca, pivavary vybačajucca, narod bajkatuje marku.
Kampanija Piwowarska, jakaja vypuskaje skandalny napoj, užo zajaviła, što zdymie biłbord sa ścienaŭ hatela Forum — jakraz nasuprać Vaviela. Rekłamny ščyt visić tam užo daŭno, adnak pratesty suprać «Chałodnaha Lecha» pačali hučać tolki ciapier.
«Heta nieprystojna. Brudna, — aburajecca deputat Jeŭraparłamienta Ryšard Čarniecki. — Hrubaść kampanii Piwowarska pierajšła ŭsie miežy. Kamiercyjnaja hulnia na čužoj śmierci — nie toje, što pasuje sučasnaj Polščy. Aŭtary hetaj idei pavinny być pakaranyja, kab inšyja nie brali ź ich prykładu».
Aŭtary ž idei tłumačać, što słohan «Chałodny Lech» pačali vykarystoŭvać jašče za hod da śmierci prezidenta, a paśla zakančeńnia žałoby
praviali markietynhavaje daśledavańnie z metaj vyśvietlić, z čym u pakupnikoŭ asacyjujecca marka. «Vyśvietliłasia, što sa śviežaściu», — zapeŭnivajuć hramadskaść zhańbavanyja pivavary.
Ale, mabyć, pryjemnyja asacyjacyi «Chałodny Lech» vyklikaje nie va ŭsich. U mižnarodnaj sacyjalnaj sietcy Facebook była stvoranaja hrupa «Lech: piva dla chamaŭ?» Na siońnia ŭ joj užo bolš za tysiaču karystalnikaŭ. Jany majuć namier bajkatavać piva, niahledziačy ni na što.