U Maskvie hrečka istotna patańnieła. Ci zakranie dobraja navina nas?

Dniami rasijskija srodki masavaj infarmacyi paviedamili: Maskva abviaściła pra rezkaje padzieńnie cenaŭ na hrečku. U pryvatnaści, paviedamlałasia, što za minuły tydzień hety pradukt patańnieŭ u rasijskaj stalicy z 80 da 57,5–59,9 rubla za kiłahram.

U kamientaryjach havaryłasia, što čynoŭniki tłumačać źnižeńnie cenaŭ pastupleńniem na pryłaŭki hreckich krupaŭ novaha ŭradžaju. «U kastryčniku ŭ Maskvu budzie pastaŭlena šeść tysiač ton hrečki z Ałtaja. Heta ŭ šeść razoŭ bolš, čym letaś». Pryvodziacca taksama ličby Rasstata: u cełym pa krainie hrečka pavialičyłasia ŭ canie z pačatku hoda ŭžo bolš čym u dva razy. U mnohich kramach hety pradukt uvohule źnik z prodažu, i rasijanie pačali masava skuplać krupy, što jašče bolš uzmacniła deficyt. «Dakładnyja pryčyny rezkaha padaražańnia hrečki pakul nieviadomyja. Va ŭradzie ličać, što vinavatyja śpiekulanty, a taksama žurnalisty, jakija aśviatlajuć hetuju prablemu», — pišuć rasijskija ŚMI.

Zališnie nahadvać, što hetaja ž tema jašče adnosna niadaŭna była aktualnaj i dla našaj krainy. Śviedčańnie tamu — kiłahramy hreckich krupaŭ, nabytych na chvali ažyjatažnaha popytu, jakija ciapier zachoŭvajucca na kuchniach mnohich biełarusaŭ. Darečy, na niadaŭniaj pres-kanfierencyi, pryśviečanaj stanu i pierśpiektyvam charčovaha rynku krainy, vystupoŭcy ź liku čynoŭnikaŭ pry vialikich pasadach nazyvali prykładna tych ža, pa ich mierkavańni, vinavatych: žurnalistaŭ i niadobrasumlennych imparcioraŭ, jakija destabilizavali abstanoŭku, nie nakiroŭvajučy pa niejkich svaich pryčynach zapasy hreckich krupaŭ sa składoŭ u roźničny handal.

Hrečka chutka źjaviłasia na palicach. U hetym nichto nie sumniavaŭsia, i tak jano nieŭzabavie i atrymałasia. Pytańni zastalisia pa canie. Apošniaja, jak viadoma, pavialičyłasia.

Naprykład, zaraz hreckija krupy spakojna stajać i ŭ kramach, i na rynkach, ale — pa 4,7–6,5 tysiačy rubloŭ za 900-hramovuju ŭpakoŭku.

Nahadajem, da ŭźniknieńnia ažyjatažnaha popytu hetaja ŭpakoŭka kaštavała mieniej za 3 tysiačy rubloŭ. Na pres-kanfierencyi žurnalistam patłumačyli, što heta, maŭlaŭ, vymušanaja miera: cana na hety charčovy pradukt u susiednich krainach vyšejšaja, čym u nas i taki krok zrobleny, kab faktyčna praduchilić vyvaz hreckich krupaŭ.

I voś navina z susiedniaj Rasii pra toje, što ciapier tam hety pradukt patańnieŭ, bolš za toje — pra deficyt navat havorki ŭ budučym nie moža być. Jakim čynam hetaje paviedamleńnie moža adbicca na našym unutranym rynku, na roźničnych cenach na hreckija krupy?

— Heta dobraja navina, kali ŭsio tak, jak pišuć, — skazała, vysłuchaŭšy pierakaz rasijskich paviedamleńniaŭ, načalnik upraŭleńnia arhanizacyi spažyvieckaha rynku Ministerstva handlu Luboŭ Jazepčyk. — Biezumoŭna, kali pavialičacca pastaŭki, pavinna budzie ŭpaści i cana na hreckija krupy. Kali vy byli na toj pres-kanfierencyi, pamiatajecie, što havorka tady viałasia pra padraŭnoŭvańnie cany, pakolki jana — roźničnaja — była ŭ nas krychu nižejšaja, čym u Rasii i inšych sumiežnych krainach.

U departamiencie pa chlebapraduktach Ministerstva sielskaj haspadarki i charčavańnia na momant padrychtoŭki materyjału atrymać niejkuju dakładnuju infarmacyju pa hetaj ža temie nie atrymałasia. U pryvatnaści, dyrektar departamienta Vasil SIEDZIN byŭ u kamandziroŭcy. Namieśnik Alena Prakopčyk, da jakoj skiravali žurnalista «Źviazdy», da hetaha času była zaniataj — udzielničała ŭ dźviuch sielektarnych naradach.

Jana zaznačyła, što pakul padnačalenyja słužby takoj infarmacyjaj nie vałodajuć, darečy, jana ničoha pra rasijskija naviny nie čuła.

My damovilisia, što za kamientaram źvierniemsia ŭ bližejšyja dni, kali ŭ departamiencie naviaduć adpaviednyja daviedki.

Siarhiej Rasolka, Źviazda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH