Ułaśnik kłuba, dzie musiŭ adbycca kancert, zajaviŭ, što ad jaho praviadzieńnia admovilisia arhanizatary. Tyja nie pahadžajucca.
Mahiloŭski kancert hurta «Lapis Trubiackoj» u ramkach turu ŭ padtrymku novaha alboma «Viesiołyje kartinki» admianili, paviedamlaje «Jeŭraradyjo». Pavodle jaho infarmacyi,
ułaśnik kłuba «Liha», dzie musiŭ adbycca kancert, zajaviŭ, što ad jaho praviadzieńnia admovilisia arhanizatary. Nibyta ŭ kłubie praciakaje dach. A z-za hetaha ŭ časie kancerta moža adbycca karotkaje zamykańnie. U svaju čarhu arhanizatar mahiloŭskaha kancerta «Lapisaŭ» ćvierdzić advarotnaje: pradadziena ŭžo 800 kvitkoŭ, tamu arhanizatary nie admaŭlalisia ad kancerta ŭ «Lizie».
Pra admienu kancerta ŭ Mahilovie paviedamlaje taksama sajt «Centr žyvoha roku».
Heta ŭžo druhi kancert «ŁT», admienieny faktyčna pa nadumanych pryčynach. 13 sakavika hurt płanavaŭ vystupić u Homieli ŭ lohkaatletyčnym kompleksie «Dynama». Za tydzień da kancertu źjaviłasia infarmacyja, što jaho mohuć admianić. Tak jano i zdaryłasia — kancert admianili, pryčyna — nibyta kancertnaja placoŭka nie zdolnaja pryniać tuju kolkaść ludziej, što nabyli kvitki.
Taja admiena stała pieršaj łastaŭkaj, paćvierdžanńniem, što novy «čorny śpis», pra jaki niezaležnyja ŚMI paviedamili ŭ pačatku sakavika, dziejničaje.U toj śpis, ź jakim nibyta aznajomili redaktaraŭ aficyjnych ŚMI, uklučanyja biełaruskija, rasijskija i zachodnija pradstaŭniki kino, muzyki, mastactva, jakich ad hetaha momantu zabaroniena zhadvać u presie. Siarod ich — «Lapis Trubiackoj», «Krama», NRM, «Pałac», «Niejra Dziubiel», Źmicier Vajciuškievič, dramaturh Andrej Kurejčyk, uvieś kalektyŭ «Svabodnaha teatra», piśmieńniki Volha Ipatava, Hienadź Buraŭkin, mastaki Mikoła Kupava, Alaksiej Maračkin, dramaturh Uładzimir Chalip. Z rasijskich zorak — DDT, «Naiŭ», «Tarakany», piśmieńnik Andrej Bitaŭ, Viktar Jerafiejeŭ, z zachodnich kinazorak — Džud Łoŭ, Kievin Spejsi dy inš, dramaturh Tom Stopard.
I choć paźniej ministr infarmacyi Aleh Pralaskoŭski nazvaŭ infarmacyju pra śpis «pravakacyjaj» i «hniusnaj falšyŭkaj», u šerahu fihurantaŭ śpisu z momamntu jaho publikacyi pačalisia prablemy.Adzin za adnym byli admienienyja kancerty «Lapisa Trubiackoha», Źmitra Vajciuškieviča (u Minsku i Breście 17 i 18 sakavika adapviedna), Neuro Dubel (kiraŭnictvu minskaha kłuba «Reaktar» naŭprost patłumačyli pryčynu tym, što hurt padtrymlivaje apazicyju), «Krambambuli» (administracyi paba «Hości» ŭ Minharvykankamie niedvuchsensoŭna paraili zamianić hurt).
0
0
0
0
0
0
