U Ńju-Jorku niečakana sarvaŭsia čarhovy raŭnd kansultacyj pa pytańni atamnaj prahramy Iranu. Na zakrytym pasiedžańni Rady Biaśpieki AAN pradstaŭnik Złučanych Štataŭ Uiljam Brenik prapanavaŭ razhledzieć na pasiedžańni Rady pytańnie ab haładoŭcy byłoha kandydata ŭ prezydenty Biełarusi Alaksandra Kazulina i sytuacyi z pravami čałavieka ŭ Biełarusi. Adnak pradstaŭnik Rasiei Vasil Čurkin kateharyčna zapiarečyŭ i pakinuŭ zalu pasiedžańniaŭ. Pasoł Kitaju ŭ AAN Van Huań patłumačyŭ žurnalistam: "Rasiejski kaleha skazaŭ, što pavinien atrymać instrukcyi ad svajho ŭradu ŭ spravie sytuacyi ŭ Biełarusi». Sa słovaŭ Čurkina, paśla niečakanaje zhadki pra Biełaruś pieramovy pa iranskim pytańni nie mahli pajści kanstruktyŭna. U vyniku planavanaje abmierkavańnie iranskaj jadziernaj prahramy było adkładzienaje.
Varta adznačyć, što inicytyvu ZŠA padtrymali dyplamaty niekatoryja inšych krainaŭ-siabroŭ AAN. Tady jak pasoł Čurkin zajaviŭ, što hetaja prablema nia maje dačynieńnia da spravaŭ Rady biaśpieki AAN. Pavodle Čurkina, kali vynosić jaje na Radu Biaśpieki, tady j luboje pytańnie možna vynieści, "navat pytańnie ab kukuruznych šmatkach". «ZŠA vybrali nia lepšy čas dla vyniasieńnia pytańnia», — hetak zreahavaŭ pradstaŭnik Vialikaj Brytanii ŭ Radzie biaśpieki Emir Džoŭnz Pery.
Jak viadoma, haładoŭkaj Alaksandar Kazulin damahaŭsia ad usich demakratyčnych uradaŭ Eŭropy i śvietu, hieneralnaha sakratara AAN, vyniasieńnia na razhlad Rady Biaśpieki AAN pytańnia ab Biełarusi.
Radyjo "Svaboda" sa spasyłkaju na ahienctva Reuters cytuje amerykanskaha čynoŭnika, jaki pažadaŭ zachavać ananimnaść, pavodle jakoha haładoŭka Kazulina vyniesła na pieršy plan sytuacyju z uciskam demakratyi ŭ Biełarusi.
Varta adznačyć, što ŭ Radzie Biaśpieki AAN biełaruskaje pytańnie zahučała ŭpieršyniu ŭ historyi.
