U Biełarusi płanujecca stvaryć novuju vytvorčaść lehkavych aŭtamabilaŭ. Pra heta paviedamiŭ namieśnik načalnika hałoŭnaha ŭpraŭleńnia inavacyjnaj i inviestycyjnaj dziejnaści Ministerstva pramysłovaści Valeryj Fišman 12 maja napres-kanfierencyi ŭ Minsku.
Jon nahadaŭ, što Biełaruś raniej sprabavała realizavać prajekt pa stvareńni vytvorčaści lehkavych aŭtamabilaŭ, adnak inviestar «byŭ nie zusim udałym». «Upeŭnienaści stopracentnaj u realizacyi novaha prajekta i zaraz u nas niama, ale rynak jość rynak, i jon za saboj paciahnie adpaviednuju vytvorčaść», — skazaŭ Fišman. Jon spadziajecca, što novy prajekt budzie bolš paśpiachovym.
Pavodle jaho słoŭ, Biełarusi nieabchodna vypuskać prykładna 20 tys. lehkavych aŭtamabilaŭ u hod, kab «była choć niejkaja pierśpiektyva i rentabielnaść». Pry hetym nie stavicca meta, kab vytvorčaść poŭnaściu zabiaśpiečvała krainu aŭtamabilami. «Chutčej za ŭsio, jana budzie raźličana na rynak nie stolki Biełarusi, kolki Rasii i inšych sumiežnych dziaržaŭ. Adnak padčas realizacyi prajekta moža być šmat źmien», — skazaŭ pradstaŭnik Minprama.
Jak paviedamiŭ staršynia Dziaržaŭnaha kamiteta pa navucy i technałohijach Biełarusi Ihar Vojtaŭ, iduć
pieramovy ab pryciahnieńni inviestycyj u prajekt pa stvareńni vytvorčaści lehkavych aŭtamabilaŭ z pradstaŭnikami Kitaja, Irana, Hiermanii i Japonii.
