Na amatarskim turniry ŭ Miensku pieramohu zdabyła rasiejskaja kamanda — «Hazpromeskspart». U finalnym matčy jana pierajhrała kamandu prezydenta Biełarusi ź likam 4:3.
Biesprecedentny vypadak. Dahetul u jakich by spabornictvach nia ŭdzielničaŭ Alaksandar Łukašenka, jahonaja kamanda niepaźbiežna pieramahała. Kiraŭnik Biełarusi ź lohkaściu abychodziŭ na łyžni alimpijskich čempijonaŭ. Jahonaja družyna razmazvała pa bartach najlepšych chakieistaŭ śvietu. I raptam, na 13‑m hodzie hetaja «niepieramožnaja armada» prajhrała. I kamu! Najpryncypoviejšym sapiernikam z «Hazpromu»!
U pramovie na cyrymonii uračystaha zakryćcia prezydent Biełarusi Alaksandar Łukašenka padkreśliŭ, što najlepšymi na im byli mienskija hledačy. Aha. Staličnyja ŭłady zabiaśpiečvali anšlah na trybunach lubym koštam. U ladovy pałac litaralna zhaniali školnikaŭ i studentaŭ z usiaho horadu. I dziela čaho? Kab jany stali śviedkami parazy kamandy prezydenta? Dy heta ž praktyčna dyversija — padryŭ aŭtarytetu kiraŭnika dziaržavy.
Zrešty, Łukašenka vyraziŭ upeŭnienaść, što praz hod, na nastupnym turniry, biełarusy viernuć sabie tytuł pieramožcaŭ. Ja navat dakładna viedaju, jak heta zabiaśpiečyć: vypuścić na lod u jakaści hałoŭnaha sudździ staršyniu Centravybarkamu Lidziju Jarmošynu. Pierad hetaj sakretnaj zbrojaj składzie kluški samy hrozny sapiernik.
Fota Pres-słužba Prezydienta Respubliki Biełaruś
