Siamiorka chmaračosaŭ Minska 56

Štohod haradskija ŭłady Minska anansujuć hučnyja budaŭnictvy handlova-zabaŭlalnych centraŭ i ofisnych vysotak. Kali b choć častka ź ich była realizavanaja, stalicu Biełarusi było b nie paznać. Šmat hod budaŭnictva chmaračosaŭ strymlivałasia papiarovymi abmiežavańniami. Doŭhi čas maksimalna dazvolenaja vyšynia pabudovy składała 75 mietraŭ. Kateharyčna suprać vysokich budynkaŭ vystupali pažarnyja — inačaj jany nie mahli harantavać biaśpieku žycharam doma.

U 2009 hodzie Ministerstva architektury i budaŭnictva narešcie prałabiravała pryniaćcie novych dakumientaŭ, jakija dali darohu niebasiaham. Ciapier vyšynia budynka nie moža pieravyšać 200 mietraŭ, ale žyłyja damy ŭsio adno abmiežavanyja. Limit dla ich — 100 mietraŭ.

Faktyčna heta kala 30 pavierchaŭ.

Prajšło dva hady «architekturnaj svabody», ale nivodnaha (!) zdadzienaha ŭ ekspłuatacyju budynku vyšynioj bolš za 100 mietraŭ tak i nie źjaviłasia, choć prajektaŭ było zajaŭlena nie mienš za dziasiatak.

Bolšaść inviestaraŭ «advaliłasia» z prostaj pryčyny — niama hrošaj.

Inšyja ž kormiać haradskija ŭłady abiacankami dahetul.

«Naša Niva» robić ahlad tych prajektaŭ, jakija dajšli chacia b da takoha adkaznaha etapa budaŭnictva, jak katłavan, ci choć by da jamy na miescy miarkavanaj budoŭli. Što budujecca i, hałoŭnaje, za čyje hrošy. Zahadzia adznačym,

nivodnaha ź biełaruskich biznesoŭcaŭ ideja chmaračosa pakul nie zacikaviła.

prajekt «Rojał Płazy».

«Rojał Płaza».

Kompleks «Itery» na Maksima Tanka. Sprava - «Vietraź».

«Vietraź».

Adzin z prajektaŭ «Minsk-Sici».

Pieršyja damy «Minsk-Sici».

Pieršyja damy «Minsk-Sici».

Prajekt «Majak Minska».

«Majak Minska» - da chajteku jašče daloka.

Praz budoŭlu «Majaka» prahladajecca Nacyjanalnaja biblijateka.

Prajekt «Hołd-Sici».

«Hołd-Sici» - budaŭnictva tolki pačynajecca.

Prajekt «Pierspolisa».

Prajekt «Safii».

1. Royal Plaza (Rojał Płaza). Inviestar — «Rubiroz Internešnł» (Livan). Vyšynia — 130 mietraŭ (30 pavierchaŭ). Ciapierašni stan — pabudavana 28 pavierchaŭ.

Ofisny budynak u pačatku praśpiekta Pieramožcaŭ (na miescy savieckaha kafe «Rečańka») abiacaje stać pieršym zdadzienym u ekspłuatacyju chmaračosam krainy. U tym, što jon budzie dabudavany, sumnievaŭ amal što niama. Ni kryzis, ni deficyt budaŭničych materyjałaŭ nie ŭdaryli pa 30-paviarchoviku. U vieraśni budzie skončana karobka, a ŭ 2012-m hodzie kampanii zmohuć zasialicca ŭ vykuplenyja ofisy.

Šklany cylindr uzvodzicca pa prajekcie adnaho z nabližanych da minskich uładaŭ architektara — Barysa Školnikava. Pa svajoj zapatrabavanaści i ŭpłyvovaści ź im moža paraŭnacca tolki stvaralnik Nacyjanalnaj biblijateki i staličnaha čyhunačnaha vakzała Viktar Kramarenka.

Viartajučysia da Rojał Płazy, adznačym, što jon budujecca za livanskija hrošy. «Rubiroz Internešnł» užo vałodaje niekalkimi minskimi biznes-centrami, naprykład, «Jeŭropaj» i «Ryhaj». A kvartał nasuprać Pałaca sportu nieŭzabavie možna budzie nazvać livanskim. Pa susiedstvu z Płazaj na miescy studenckaha internatu vyraście jašče adzin biznes-centr, jaki budzie naležać pradstaŭnikam hetaj azijackaj krainy.

2. «Vietraź». Inviestar — «Itera» (Rasija). Vyšynia — 132 mietry (32 pavierchi). Ciapierašni stan — pabudavana 30 pavierchaŭ.

Budynak, jaki pieršym pierajšoŭ histaryčnuju dla Biełarusi stomietrovuju vyšyniu, na niekalki miesiacaŭ zahłoch. Pryčyna banalnaja — deficyt cemientu. Tydzień tamu budaŭniki ŭsio ž pačali zalivać pieradapošni, 31-i pavierch.

Miarkujecca, što žyły dom na skryžavańni vulic Cimirazieva, Maksima Tanka, Kłary Cetkin i Kalvaryjskaj budzie pieršaj pabudovaj u kompleksie z troch-čatyroch vysotak. Pieršyja prajekty, prapanavanyja zabudoŭščykam, šakavali kansiervatyŭnaje biełaruskaje hramadstva. Hmachi pa 50–60 pavierchaŭ abiacali stać architekturnaj daminantaj usiaho horada. Paradoks, ale, praihnaravaŭšy pratesty žycharoŭ susiednich damoŭ, rasijanie nieŭzabavie sami adraklisia ad raniejšych płanaŭ.

Pazicyi «Itery» na biełaruskim rynku sasłabieli, i ŭžo nichto nie ŭ stanie harantavać, što ich budaŭnictva nie skončycca na «Vietrazi».

3. «Minsk-Sici». Inviestar — «Itera» (Rasija). Vyšynia — nieviadoma. Ciapierašni stan — pabudavanyja niekalki «panelek» na ŭskrajku.

«Razynkaj kompleksu stanie pieršy sapraŭdny minski chmaračos — vieža ŭ 80 pavierchaŭ», — pisała presa ŭ 2008 hodzie. «Minsk-Sici» na miescy aeraporta «Minsk-1» musiŭ kaštavać $5 miljardaŭ, ale takich hrošaj u «Itery» zaraz niama. Łukašenka nie admaŭlajecca ad pasłuhaŭ rasijanaŭ, bo inšych inviestaraŭ na haryzoncie niabačna. Jość i inšaja pryčyna — jak užo pisała «NN», «Itera» praciahvać budavać kala Drazdoŭ pryvatnuju rezidencyju «Žyły kompleks «Uschod».

Pakul što «Minsk-sici» ŭsychaje navat na papiery. Chmaračosy na renderach źmienšylisia ŭžo ŭdvaja, i stanovicca zrazumieła, što da čempijanata śvietu pa chakiei-2014 budaŭnikam nie paśpieć užo nijak.

…A tym časam samy hučny prajekt 2000-ch hadoŭ pačaŭ vyrastać z uskrainaŭ. Zaraz tam uźviedziena para-trojka10-15-paviarchovyk «panelek». Moža, mienavita jany zastanucca niemym pomnikam epochi budaŭnictva biełaruskich Ńju-Vasiukoŭ.

4. «Majak Minska». Inviestar — «Zomieks Inviestmient» (Šviejcaryja/psieŭda-Vialikabrytanija). Vyšynia — 80 pavierchaŭ (280 mietraŭ). Ciapierašni stan — pabudavanyja niekalki žyłych damoŭ na ŭskrajku.

Zamach architektaraŭ byŭ nie mienšym za «Minsk-Sici» — ofisnaja vieža na 80 pavierchaŭ sa špilem, jaki dasiahnie 280 mietraŭ. I ŭ dadatak vosiem 40-paviarchovych damoŭ pa susiedstvu z Nacyjanalnaj biblijatekaj. Usio razam — na $4 miljardy inviestycyj. Na vychadzie pakul nie atrymaŭsia pšyk, ale tempy realizacyja prajektu, vidavočna, adstajuć ad hrafika. I kali budaŭnictva viadziecca — zaraz uciaplajecca niekalki dziesiacipaviarchovikaŭ,-to historyja z zabudoŭščykam dahetul vyhladaje ćmianaj.

Pavodle infarmacyi dziaržaŭnych ŚMI, brytanskaja kampanija «Zomieks Inviestmient» uvachodzić u skład chołdynhu WorldWide Building group, nazvu jakoj možna advolna pierakłaści jak «Suśvietnaja budaŭničaja hrupa». Voś tolki internet ničoha nie maje ni pra pieršuju, ni pra druhoha. Viadoma tolki imia dyrektara (sierb Alaksandr Stojkavič) i staršyni naziralnaj rady «Zomieksa» (Ronald Kupierśmit, usie ŭzhadvańni pra jakoha pryvodziać na anhłamoŭnuju viersiju sajta BiełTA). Kolki hrošaj u tajamničych brytancaŭ, nichto taksama nie viedaje, voś tolki budaŭnictva budzie vieścisia na kredytnyja hrošy «BPS-banka».

5. «Futurys»/«Hołd Sici». Inviestar — biznesoŭca Vinsient Pietryła (Vialikabrytanija). Vyšynia — 25 pavierchaŭ (103 mietry). Ciapierašni stan — pabudavanyja dva pavierchi.

Historyja hetaha biznes-centra ź vidam na Uschodnija mohiłki nie prosta ćmianaja, a navat kryminalnaja. Jaho sabralisia budavać jašče ŭ 2008 hodzie jak pieršy biełaruski chmaračos pad nazvaj «Hołd-Sici», a pačali tolki zaraz — jak «Futurys». Reč u tym, što biełaruskija partniory brytanskaha biznesoŭcy Vinsienta Pietryły patrabavali ad jaho dadatkovyja 3 miljony jeŭra, nibyta dla chabaru čynoŭnikam. U momant pieradačy hrošaj jany byli zatrymanyja, ale budaŭnictva nadoŭha adkłałasia.

Takim čynam, niekalki miesiacaŭ tamu niepadaloku ad stancyi mietro «Barysaŭski trakt» była ŭračysta zakładzienaja kapsuła, jakaja aznamienavała pačatak supracoŭnictva Pietryły i minskich uładaŭ. «Futurys» — prajekt zhadanaha vyšej Viktara Kramarenki. U dvuch słovach — šmat škła i hieamietryčnaja fihura źvierchu. U apisvanym vypadku — załaty šar, jaki architektaram nazyvajecca «kryštalnaja śfiera».

Pietryła vyhladaje aščadnym inviestaram, jon spadziajecca ŭkłaścisia ŭsiaho ŭ 50 miljonaŭ jeŭra.

Pieraličanyja vyšej kompleksy ŭžo ŭzvodziacca, u toj ci inšaj stupieni. Niekatoryja inšyja pakul majuć tolki zakładzienuju kapsułu ci ŭvohule sumnuju jamu pasiarod budoŭli.

6. Perspolis (PiersPolis). Inviestar — Semega (Iran). Vyšynia — 39 pavierchaŭ (160 mietry). Ciapierašni stan — pracy nie pačynalisia.

Prajekt chołdynha pa turyzmu i kulturnaj spadčynie Irana Semega vydzialajecca hihanckimi musulmanskimi ŭzorami na ŭsiu vyšyniu budynka. Simvaličnaja kapsuła na miescy budaŭnictva piacizorkavaha hatela była zakładzienaja na vulicy Niamiha ŭ krasaviku 2011 hoda. Abjom inviestycyj aceńvajecca ŭ $150 miljonaŭ.

7. «Safija». Inviestar — «Kravira» (Siryja). Vyšynia — 50 pavierchaŭ (150 mietraŭ). Ciapierašni stan — pracy nie pačynalisia.

Prajekt uklučany ŭ śpis chmaračosaŭ avansam. 50-paviarchovybiznes-centr nibyta budzie nastupnym krokam siryjskaj «Kraviry» paśla 15-paviarchovaha handlovaha centra i 30-paviarchovaha hatela. Usie jany mohuć paŭstać na vulicy Kłary Cetkin, ale pakul što nie pačałosia budaŭnictva nivodnaha z hetych budynkaŭ.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH