Prakuraturaj Maskoŭskaha rajona Minska raspačataja kryminalnaja sprava ŭ dačynieńni da hramadzianina Turcyi, kiraŭnika pradstaŭnictva kampanii TAA «Erym», jaki ŭdzielničaŭ u budaŭnictvie administracyjnaha budynka pa vuł. Varvašeni.
Jašče ŭ pačatku hoda pravaachoŭnyja orhany Minska zacikavilisia abstavinami realizacyi prajekta pa budaŭnictvie abjekta «Administracyjny budynak z ubudavanaj padziemnaj aŭtastajankaj pa vuł. Varvašeni». Padstavaj dla cikavaści pasłužyŭ zvarot adnaho z udzielnikaŭ prajekta, jaki paviedamiŭ pra šerah supraćpraŭnych dziejańniaŭ kiraŭnika pradstaŭnictva TAA «Erym».
Pa zajavie apieratyŭnikami ABEZ Maskoŭskaha RUUS była praviedzienaja pravierka, ale nijakaha składu złačynstva ŭ dziejańniach kiraŭnika pradstaŭnictva vyjaŭlena nie było.
Praŭda, paśla milicyi materyjały pravierki pastupili ŭ prakuraturu, jakaja pahladzieła na ŭsiu situacyju krychu inakš. U vyniku prakuratura Maskoŭskaha rajona admianiła pastanovu ABEZ i raspačała ŭ dačynieńni da kiraŭnika pradstaŭnictva TAA «Erym» Amiera Ałtekina kryminalnuju spravu pa padazreńni ŭ ździajśnieńni im złačynstva pa č.4 art. 210 Kryminalnaha kodeksa Biełarusi (kradziež šlacham złoŭžyvańnia słužbovymi paŭnamoctvami, učynieny arhanizavanaj hrupaj albo ŭ asabliva bujnym pamiery). Sankcyja hetaha artykuła praduhledžvaje pakarańnie da 12 hadoŭ pazbaŭleńnia voli z kanfiskacyjaj majomaści.
Pavodle dadzienych prakuratury, hramadzianin Turcyi, z 9 krasavika pa kastryčnik 2010 hoda, źjaŭlajučysia kiraŭnikom pradstaŭnictva TAA «Erym», šlacham złoŭžyvańnia słužbovymi paŭnamoctvami padčas budaŭnictva abjekta «Administracyjny budynak z ubudavanaj padziemnaj stajankaj pa vuł. Varvašeni», ździejśniŭ kradziež bolš čym 1,8 młrd rubloŭ, jakija naležać AAT «Biełharchimpram».
Cam padazravany ciapier znachodziccapa-za dasiažnaściu pravaachoŭnaj sistemy Biełarusi, bo jašče 5 vieraśnia 2010 palacieŭ na radzimu ŭ Stambuł i bolš u Biełarusi nie źjaŭlaŭsia.
Ciapier pa spravie pravodziacca śledčyja mierapryjemstvy, padčas jakich płanujecca vyśvietlić usie abstaviny hetaj historyi i stupień udziełu ŭ kradziažy srodkaŭ tureckaha hramadzianina.
