Biełarusy stali bolš adpačyvać u ajčynnych sanatoryjach i turystyčnych kompleksach, paviedamiŭ žurnalistam ministr sportu i turyzmu Aleh Kačan paśla adkryćcia vystavy
«Viadoma, kryzis paŭpłyvaŭ na ahulnyja tendencyi raźvićcia turyzmu ŭ śviecie, — zaznačyŭ jon. — Samym ciažkim byŭ 2009 hod, letaś turbiźnies pačaŭ nabirać abaroty. Što tyčycca Biełarusi, kolkaść vyjaznych turaŭ našych hramadzian skaraciłasia, a voś u śfiery ŭnutranaha turyzmu abarot pavialičyŭsia. Ludzi stali bolš adpačyvać u ajčynnych sanatoryjach, turystyčnych kompleksach, na turbazach. Naprykład, sioleta naviedvańnie adrestaŭravanaj častki Niaśvižskaha zamka pavialičvajecca na 30–40% štomiesiac».
Na dumku Kačana, kryzis sadziejničaje adkryćciu ŭ krainie novych turystyčnych abjektaŭ. U 2011 hodzie kolkaść turkompleksaŭ pavialičyłasia da 1.500 (letaś — 1.200), budujucca taksama hateli, abjekty prydarožnaha servisu. U halinu pastupajuć nie tolki dziaržaŭnyja srodki, ale i pryvatnyja inviestycyi. «Turyzm — samaja chutkaakupnaja śfiera, — zaŭvažyŭ ministr, — i ja b paraiŭ tym, chto šukaje siabie ŭ biźniesie, zaniacca turysckaj śfieraj».
Ministerstva sportu i turyzmu prapanoŭvaje adkryvać na miažy konsulskija punkty dla spraščeńnia vizavaha režymu, paviedamiŭ Kačan. «Libieralizavać ujezd turystaŭ u krainu — sam boh nakazaŭ», — upeŭnieny jon.
Pavodle jaho słoŭ, mahčymaść spraščeńnia vizavaha režymu abmiarkoŭvajecca na ŭzroŭni ministerstvaŭ i viedamstvaŭ užo niekalki hadoŭ. Minsportu, u pryvatnaści, zacikaŭlena ŭ hetym dla pavieličeńnia ekspartu płatnych pasłuh, rastłumačyŭ Kačan.
Ministr padkreśliŭ, što razmova nie idzie pra admienu vizavaha režymu, tamu što «dziaržava pavinna abaraniać siabie». Razhladajecca tolki mahčymaść libieralizacyi vizavaha režymu dla inšaziemcaŭ, jakija pryjazdžajuć u Biełaruś.
