Minharvykankam inicyjuje ŭźniaćcie taryfu na TA žylla i adličeńniaŭ na kapramont 4

Minharvykankam inicyjuje ŭźniaćcie taryfu na techničnaje absłuhoŭvańnie žylla i adličeńniaŭ na kapramont. Pra heta na pres-kanfierencyi 9 listapada paviedamiŭ hienieralny dyrektar HVA «Minskaja haradskaja žyllovaja haspadarka» Uładzimir Rejentovič.

Pavodle jaho słoŭ, takaja prapanova adpraŭlena ŭ Ministerstva žyllova-kamunalnaj haspadarki. Rejentovič paviedamiŭ, što pry ŭzroŭni sabiekoštu techničnaha absłuhoŭvańnia 1.081 rubiel na adzin kv. mietr za miesiac i sabiekoštu kapramontu 514 tys. rubloŭ na 1 kv. mietr, žylcy apłačvajuć tolki kala 30% ad zatrat, abo 350 rubloŭ za 1 kv. mietr za miesiac. Minharvykankam prapanoŭvaje pavysić hety taryf da 560 rubloŭ. «My nie pryjdziem da taho, kab nasielnictva stopracentna kampiensavała zatraty na toj ža kapramont, ale pry hetym stanie termin akupnaści składaje 112 hadoŭ. My pavinny rabić adzin raz na 30 hadoŭ kapramont, my zrobim čatyry kapitalnyja ramonty, pakul nasielnictva apłacić pieršy kapramont», — rastłumačyŭ śpiecyjalist.

Jon taksama nahadaŭ, što z 1 studzienia 2012 hoda pry praviadzieńni kapramontu zamiena vodapravoda i kanalizacyi ŭ kvatery budzie ažyćciaŭlacca za košt srodkaŭ žylcoŭ.

Jak paviedamiŭ Rejentovič, u 2011 hodzie ŭ Minsku zapłanavana kapitalna adramantavać 714 tys. kv. mietraŭ žylla, za 10 miesiacaŭ zdadziena ŭ ekspłuatacyju paśla ramontu 413 tys. kv. mietraŭ. Prahramu da kanca hoda płanujecca vykanać. Razam z tym jon zaznačyŭ, što adstavańnie ad vykanańnia piacihadovaj prahramy składaje dva-try hady. «Kab jaje vykanać, my pavinny štohod naroščvać abjomy kapramontu na 20%», — zaznačyŭ śpiecyjalist. Pavodle jaho infarmacyi, u 2012 hodzie ŭ Minsku zapłanavana adramantavać 734 tys. kv. mietraŭ žylla, što na 3% bolš za płany hetaha hoda.

Rejentovič adznačyŭ tendencyju pa pavieličeńni materyjalnaha ŭdziełu nasielnictva va ŭtrymańni žyllovaha fondu. Tak, z pačatku hoda z udziełam nasielnictva było adramantavana 2.020 padjezdaŭ. Jano apłaciła 50% ad koštu rabot. Aprača taho, nasielnictva apłačvaje takija vidy rabot, jak uciapleńnie fasadaŭ, stykaŭ, stvareńnie kazyrkoŭ nad bałkonami. Z pačatku hoda na takija vidy rabot było pryciahnuta 5 młrd. rubloŭ. Taksama nasielnictva častkova apłačvaje dobraŭparadkavańnie dvarovych terytoryj i stvareńnie na ich parkovačnych miescaŭ. Tak, sioleta ŭ staličnych dvarach stvorany dadatkova 9.200 parkovačnych miescaŭ, u tym liku kala 2 tysiač z pryciahnieńniem srodkaŭ nasielnictva. «Takaja rabota budzie praciahvacca i ŭ nastupnym hodzie», — zaznačyŭ Rejentovič.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH