U Chojnickim rajonie adzin zubr zabity, druhi — ciažka paranieny 6

Chojnicki RAUS viadzie śledstva pa fakcie hibieli adnaho i ranieńnia druhoha zubroŭ.

25 studzienia ŭ Brahinskuju mižrajonnuju inśpiekcyju achovy žyviolnaha i raślinnaha śvietu pastupiła paviedamleńnie, što na pole blizu adsielenaj vioski Mokiš Chojnickaha rajona znojdzieny zubry, adzin ź jakich nieruchomy.

Jak paviedamili ŭ Homielskaj abłasnoj inśpiekcyi achovy žyviolnaha i raślinnaha śvietu, rejdavaja hrupa ŭ składzie pryrodaachoŭnych inśpiektaraŭ, palaŭnictvaznaŭcaŭ Paleskaha dziaržaŭnaha radyjacyjna-ekałahičnaha zapaviednika i milicyjanieraŭ, jakaja vyjechała na miesca, znajšła zubroŭ. Adzin ź ich byŭ miortvy, druhi — ź ciažkim ranieńniem, nie zdolny padniacca na kaniečnaści.

Ustanoŭlena, što ŭzrost adnoj samki zubra — 12–14 hadoŭ, druhoj, z embryjonam, — prykładna vosiem hadoŭ. Ahulnaja vaha zubroŭ 700 kh. Uron, naniesieny niezakonnaj zdabyčaj zubroŭ, skłaŭ amal 30 młn. rubloŭ.

U Chojnickim RAUS nie paviedamlajuć pra padazronych u zabojstvie zubroŭ, spasyłajučysia na toje, što pravodzicca pravierka. Jak stała viadoma BiełaPAN, u rajonie palavali inšaziemcy, hramadzianie adnoj z krain Bałtyi.

Vierahodna, jany i zabili samak zubroŭ i nie prainfarmavali pra heta pravaachoŭnyja ci palaŭničyja struktury. Zamiežnyja palaŭničyja pajechali na radzimu, a zatym byli znojdzieny samki zubroŭ.

Mierkavańnie ab tym, što zabili zubroŭ mienavita hetyja palaŭničyja, hruntujecca na ekśpiertyzie kul. Jość infarmacyja, što zamiežnyja hramadzianie pierabłytali zubroŭ ź dzikami.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH