U rajonie Paŭnočny pasiołak ŭ Lidzie z kranaŭ išła «aramatyzavanaja» vada. Fota Nastaśsi Šamrej.
Ranicaj 28 studzienia mnohija žychary Lidy adčuli ŭ pitnoj vadzie z kranaŭ chimičny pach.Jak paviedamlaje miascovy sajt Lida.info, pieršapačatkova skarhi na jakaść vady pastupali ad žycharoŭ vulic Tuchačeŭskaha, Rybynoŭskaha i Hasteły. Taksama pach ci to acetonu, ci to salvientu adčuvali i žychary inšych rajonaŭ horada.
Zdareńnie z vadoj u Lidzie spravakavała chvalu čutak.Na internet-forumie pišuć pra mahčymuju avaryju na adnym z chimičnych zavodaŭ horada; pra paciarpiełych, źmieščanych u balnicu z atručvańniami; pra raskuplenuju ŭ mahazinach butylavanuju pitnuju vadu.
Našy čytačy ź Lidy, jakija žyvuć u adnym z rajonaŭ, dzie ŭźnikli prablemy z vadoj, paćviardžali najaŭnaść niepryjemnaha pachu. Pry hetym jany nie viedajuć nivodnaha fakta špitalizacyi kahości ź blizkich ci znajomych.
Tym časam miascovaja słužba ŽKH praź lidski telekanał paviedamiła pryčyny zdareńnia:«Žychary asobnych rajonaŭ Lidy adčuli niezvyčajny pach pitnoj vady, što vyklikała sumnievy: ci prydatnaja jana dla vykarystańnia i ci biaśpiečna heta dla zdaroŭja? Vyśvietliłasia, što sapraŭdy pa chimičnych paramietrach jość nievialikija adchileńni, ale jana adpaviadaje narmatyvam i nie ŭjaŭlaje pahrozu zdaroŭju nasielnictva.
A niepryjemny pach vyklikany tym, što minułaj nočču z-za mocnych marazoŭ byli pryniaty miery pa praduchileńni pramiarzańnia trubapravoda.
U hety čas u asobnych zonach na vodazabory «Baroŭka» prachodziŭ ramont, u tym liku i afarboŭka pamiaškańniaŭ. Z-za hetaha adbyłosia nasyčeńnie padavanaj vady pachami ramontu. Usie niazručnaści buduć likvidavany na praciahu 24 hadzin. Da hetaha času vadoj karystacca možna, ale papiarednie jaje nieabchodna prakipiacić».
Ale ni 29, ni 30 studzienia vada nie pryjšła ŭ normu.U paniadziełak pa abiedzie žychary niekatorych damoŭ paviedamlali, što vadu pa-raniejšamu niemahčyma pić praź śpiecyfičny pach.
My patelefanavali na lidski vadakanał. Tam taksama skazali, što vada nabrałasia pachu ad farby. Maŭlaŭ, u zale filtracyi sapraŭdy farbavali padłohu.I majstar nie adčyniŭ vokny, kab pravietryłasia. Tam paviedamili, što telefanavańni sa skarhami iduć ciaham paniadziełka. Pa takich adrasach pasyłajuć brahady, jakija chłaryrujuć vadu.
Na vadakanale zapeŭnili, što proby vady prajšli analiz i jaje možna pić. Rajać tolki, kab pierad užyvańniem jana adstajałasia.
31 studzienia, jak paviedamili žychary adnaho z damoŭ, dzie byli prablemy, pach narešcie źnik. Dyrektar lidskaj ŽKH Siarhiej Saŭko nie ličyć prablemu istotnaj:
«Adna baba druhoj skazała. Jany čuli tam, dzie taho nie było. A my drenna spracavali, što ludziej nie supakoili».
Pa jaho słovach, prablemy nie było. A tolki nieparazumieńnie.
«Pytańniaŭ pa vadzie niama. I skarhaŭ niama niekalki dzion».
Saŭko adznačyŭ, što mienavita supracoŭniki ŽKH paprasili pravieści analiz vady, kab zaśviedčyć jaje prydatnaść.
