Lubić nia lubić
Ahladalnik UPI ličyć, što Łukašenka na tym tydni, padčas sustrečy ŭ Maskvie z rasiejskim prezydentam Pucinym, faktyčna pahadziŭsia na dałučeńnie Biełarusi da Rasiei. A Łukašenka ŭ aŭtorak i sieradu dvojčy sustreŭsia z delehacyjaj amerykanskich kanhresmenaŭ i hučna zajaviŭ pra “novuju eru ŭ biełaruska-amerykanskich adnosinach”. Nie, daliboh, zamiežnapalityčny kurs Biełarusi mianiajecca namnoha čaściej, čym vietryk u mai.
Sud u Voršy
Aršaniec Jury Konyška sudzicca z tamtejšaj telekampa-nijaj “Skif”. Jon padavaŭ płatnuju abjavu pra šeście na Dziady, a jaje nie pakazali. Ciapier jon choča spahnać z kampanii hrošy za abjavu i kampensacyju za maralnyja straty. Tradycyjna šeście jdzie da Kabylackaj hary, dzie ŭ časie stalinskich represijaŭ byli rasstralanyja niekalki sotniaŭ čałaviek. Pavodle nazirańniaŭ hledačoŭ, za ŭvieś čas isnavańnia “Skifu” ŭ eter nie było prapuščana nivodnaj abjavy pa-biełarusku. Raniej heta tłumačyłasia adsutnaściu biełaruskamoŭnych dyktaraŭ.
Usim nieabyjakavym
Zinaida Hančar, Ullana Zacharanka, Volha i Śviatłana Zavadzkija dy Iryna Krasoŭskaja zaklikali ŭsich nieabyjakavych ludziej 10 śniežnia, u Mižnarodny dzień pravoŭ čałavieka, sabracca a 12-j na mienskaj Kastryčnickaj płoščy, kab jašče raz nahadać uładam pra źnikłych ludziej. Žančyny miarkujuć, što zaklik nie supiarečyć zakonu, i nie źviartalisia ŭ harvykankam pa dazvoł.
Somy i “boty”
Parlamentary bratniaj nam Kirhizii ŭzakonili “vodkup” ad słužby ŭ vojsku. Kaštavać heta budzie 25 tys. somaŭ (trochi bolš za miljon rubloŭ).
Biskup nielehalna-mihrancki
Kiraŭnik ukrainskaje hreka-katalickaje carkvy kardynał Lubamir Huzar vypravić u Italiju biskupa, jaki budzie apiekavacca ŭkrainskimi nielehalnymi imihrantami. Na jahonuju dumku, ich kolkaść moža dasiahać miljona.
B.T.
