Чарговая буйная партыя беларускіх цыгарэт на мяжы: палякі затрымалі груз на $2,3 млн
За такую вялікую колькасць кантрабанды цыгарэт ён можа быць пазбаўлены волі на тэрмін да 10 гадоў, піша Польскае радыё.
Кантрабанда 600 тысяч пачак цыгарэт без польскіх акцызных марак была знойдзена супрацоўнікамі Падляшскай падатковай адміністрацыі на памежным пераходзе з Беларуссю ў Кузніцы. Нелегальны тавар перавозілі ў спецыяльных скрынях, якія імітуюць паддоны з дошкамі. Кошт кантрабанды ацэньваўся ў 2,3 млн даляраў.
Функцыянеры на памежным пераходзе ў Кузніцы затрымалі грузавік, якім кіраваў 28-гадовы беларус, які, паводле дакументаў, павінен быў перавозіць дошкі. Падчас дэталёвай праверкі грузавіка, якой папярэднічалі рэнтгенаўскія здымкі, высветлілася, што ў прычэпе, у спецыяльна падрыхтаваных скрынях, якія імітуюць паддоны з дошкамі, захоўваецца кантрабанда цыгарэт. Разгрузка і дакладны падлік занялі суткі.
Беларускі кіроўца быў часова арыштаваны на тры месяцы. За такую вялікую колькасць кантрабанды цыгарэт ён можа быць пазбаўлены волі на тэрмін да 10 гадоў.
