«Livierpul» patapiŭ «Viljareał»: u paŭfinale Lihi čempijonaŭ «žoŭtaja submaryna» atrymała dźvie praboiny
Anhlijski hrand usiaho za 133 siekundy druhoha tajma źniščyŭ tryŭmfatara Lihi Jeŭropy na «Enfiłdzie». Da taho ž Sadźjo Mane staŭ samym vynikovym afrykancam u płej-of najbolš prestyžnaha kantynientalnaha turnira dla kłubaŭ.
Anhličanie aformili pryhožuju pieramohu ŭsiaho za 133 siekundy. Fota: Uefa.com
Jak ni namahałasia «žoŭtaja submaryna» zastacca na płavu ŭ vodach Anhlii, ničoha nie atrymałasia. Kalektyŭ Unai Emiery, što ŭ čverćfinale vybiŭ ź Lihi čempijonaŭ samu miunchienskuju «Bavaryju», raŭndam paźniej nie zładziŭ z «Livierpulem».
Były trenier łondanskaha «Arsienała» viarnuŭsia na «Enfiłd» da pryncypijalnych supiernikaŭ ź niebłahim taktyčnym płanam. Adnak jon dazvoliŭ «Viljareału» tolki 45 chvilin zmahacca z «Livierpulem» na roŭnych.
«Viljareał» tolki 45 chvilin zdoleŭ zmahacca z «Livierpulem» na roŭnych. Fota: Uefa.com
A voś paśla pierapynku anhličanie aformili pryhožuju pieramohu ŭsiaho za 133 siekundy. Spačatku jany spravakavali aŭtahoł z boku Estupińjana…
A paśla aktyvavali źviazku Machamied Sałach — Sadźjo Mane.
Jana, darečy, samaja praduktyŭnaja ŭ Lizie Čempijonaŭ za apošnija piać hadoŭ: jehipcianin užo siem razoŭ asistavaŭ sieniehalcu.
Dla Sadźjo trapny streł mieŭ jašče i važny piersanalny sens, bo jon staŭ 14-m u aktyvie afrykanca na palach Lihi čempijonaŭ padčas stadyj płej-of. Heta paŭtareńnie rekorda dla čornaha kantynienta, jaki raniej ustalavaŭ Dzidźje Drahba. Da taho ž miač staŭ 450-m dla «Livierpula» ŭ topavym jeŭrakubku.
Varta adznačyć, što «Livierpul» ciaham usioj sustrečy vyhladaŭ bolš sprytnym i chutkim u paraŭnańni z supiernikam. I heta pry tym, što matč dla padnačalenych Jurhiena Kłopa staŭ užo 55-m u siezonie.
Dla padnačalenych Jurhiena Kłopa matč staŭ užo 55-m u siezonie. Fota: Uefa.com
Dadamo, što sustreča ŭ adkaz adbudziecca na ispanskim stadyjonie «Ła Sieramika» 3 traŭnia. Pieramožca pary sustreniecca z tryumfataram u tandemie «Reał» — «Mančester Sici».
