U Minsku źbirajucca ŭzakonić «samavolnyja» kvietniki, za jakija ciapier majuć štrafavać
Ułady stalicy mohuć uzakonić dobraŭparadkavańnie prydamavych terytoryj, vykananaje hramadzianami samastojna, pišuć «Minsk-Naviny» sa spasyłkaj na namieśnicu staršyni Kamiteta ziemleŭparadkavańnia harvykankama Hannu Dubkovu. Ciapier heta parušeńnie zakona i moža karacca štrafam da 25 bazavych vieličyń.
Z 2022 hoda i pa siońnia, pa słovach Dubkovaj, u Minsku vyjaŭleny šerah parušeńniaŭ ziamielnaha zakanadaŭstva i pravił dobraŭparadkavańnia.
«Niekatoryja hramadzianie, nie atrymaŭšy dazvołu haradskich uład, dobraŭparadkavali ziamlu ahulnaha karystańnia, prylehłuju da ich ziamielnych učastkaŭ, — patłumačyła čynoŭnica. — Naprykład, zaasfaltavali padjezdy, pakłali plitku, pasadzili dekaratyŭnyja raśliny, raźbili kvietniki».
Heta ŭsio ciapier — parušeńnie praviłaŭ dobraŭparadkavańnia, jakija ŭ 2016 hodzie zaćvierdziŭ Minski harsaviet. Ale takija fakty staličnyja ŭłady mohuć uzakonić, pryniaŭšy adpaviednyja rašeńni, i haradžanam nie pryjdziecca płacić štrafy za svaju inicyjatyvu.
Pradstaŭnica Minharvykankama dadała, što ludziej prainfarmujuć pra najaŭnaść parušeńniaŭ — da hetaha času ich naličyli zvyš 6 tysiač, — a da 2025 hoda prymuć miery pa lehalizacyi.
Z adnaho boku, pa słovach čynoŭnicy, hramadzianie niby i małajcy, što samastojna dobraŭparadkavali svaje dvary i aščadzili biudžetnyja hrošy. Ale ź inšaha — heta ž dziejańni suprać dyscypliny i paradku, imi parušajucca ŭstanoŭlenyja ŭładami praviły.
A za heta praduhledžana administracyjnaja adkaznaść pa art. 22.10 KaAP — štraf da 25 bazavych dla fizičnaj asoby, ad 20 da 100 dla jurydyčnaj i ad 10 da 50 dla indyvidualnaha pradprymalnika.
Zrešty, Hanna Dubkova zapeŭniła, što luboje dobraŭparadkavańnie, jakoje nie abmiažoŭvaje dostup da ziamiel ahulnaha karystańnia, budzie ŭzakoniena. I tolki kali dostupu niama, to abjekt dobraŭparadkavańnia demantujuć.
Čytajcie taksama:
Łukašenka padpisaŭ ukaz ab sadavodčych tavarystvach
A moža nie varta tak časta kasić hazon? Voś što pra heta kaža navuka
https://dcsfxzu8xls6u.cloudfront.net/318050