Zatrymanyja va Ukrainie dvoje hramadzian Biełarusi z žurnalisckimi paśviedčańniami, u tym liku Ściapan Čyryč, jaki zdymaŭ siužet dla telekanała NTV, padazrajucca ŭ špijanažy. Ab hetym paviedamlaje infarmahienctva UNIAN sa spasyłkaj na namieśnika kiraŭnika — kiraŭnika aparata Dnieprapiatroŭskaj abłasnoj dziaržadministracyi Hienadzia Korbana.
Jak raniej paviedamlaasia, Čyryč pracuje pradziusaram u rasijskaj «Pieršaj pradziusarskaj kampanii» («PPK»), jakaja zajmajecca vytvorčaściu prahramy «Centralnaje telebačańnie z Vadzimam Takmianiovym» dla NTV. Pavodle infarmacyi sajta telekanała, 22 krasavika jon vyjechaŭ u horad Pieršatraviensk Dnieprapiatroŭskaj vobłaści, dzie pa zadańni redakcyi pavinien byŭ źniać siužet pra vizit va Ukrainu pratestanckaha śviatara Boba Łarsana ŭ miežach jaho suśvietnaha turne. Biełarus pierastaŭ vychodzić na suviaź z redakcyjaj 23 krasavika.
Pavodle słoŭ Korbana, zatrymańnie dvuch biełarusaŭ adbyłosia niedaloka ad horada Krasnaarmiejska. U zatrymanych byli znojdzieny žurnalisckija paśviedčańni, technika dla fota- i videazdymki i fłeš-karty, «na jakich byli sfatahrafavany ŭvachody i vychady, aharodža roznych administracyjnych budynkaŭ», u tym liku «budynkaŭ milicyi i miascovych savietaŭ u niekatorych nasielenych punktach Dnieprapiatroŭskaj i Danieckaj abłaściej», skazaŭ pradstaŭnik administracyi.
Korban padkreśliŭ, što zatrymanyja dastaŭleny va ŭpraŭleńnie SBU Dnieprapiatroŭska, viadziecca rasśledavańnie. Pavodle dadzienych UNIAN, u hutarcy z rabotnikami ŭkrainskich śpiecsłužbaŭ Čyryč zajaviŭ, što prybyŭ va Ukrainu dla zdymak ekzarcyzmu i pracy carkvy, a śpiecsrodki i kamieru ŭ akularach rastłumačyŭ mahčymaściu zabarony zdymak. Druhi zatrymany raskazaŭ, što Čyryč paprasiŭ jaho dapamahčy ŭ zdymkach pracy pratestanckaha śviatara Boba Łarsana za 400 hryŭniaŭ u sutki.
U svaju čarhu kamandzir śpiecbatalona «Dniepr» Juryj Biaroza paviedamiŭ, što na zroblenych žurnalistami fatahrafijach niama carkvy ci padziej u joj, a pakazany rajadździeły milicyi, miascovyja administracyjnyja budynki i vajennyja abjekty na ŭschodniaj miažy Dnieprapiatroŭskaj vobłaści, u pryvatnaści kropki SPA.
