U kazusnuju situacyju trapiŭ žychar Homiela. Dźmitryja Rastenka prosiać viarnuć hrošy za apłačany dziaržavaj balničny. I heta niahledziačy na toje, što paśla ciažkaj avaryi jon čatyry miesiacy pravioŭ pad nahladam lekaraŭ. U abłasnym upraŭleńni Fonda sacabarony hety vypadak nazvali unikalnym i paabiacali detalova razabracca.
Tuju strašnuju avaryju Dźmitryj uspaminaje da hetaha času. Minułym letam jon jechaŭ dadomu na skutery i ŭrezaŭsia ŭ mikraaŭtobus. Akramia jaho, u DTZ nichto nie paciarpieŭ, sam ža vinavaty ŭ avaryi čatyry miesiacy uzmocniena lačyŭsia. Paśla vypiski jamu stali prychodzić dziŭnyja listy: Fond sacyjalnaj abarony nasielnictva prosić jaho viarnuć hrošy za ŭžo vypłačany balničny. A heta bolš za 20 miljonaŭ rubloŭ.
Dźmitryj Rastenka, žychar h. Homiela: «Heta ž balničny. U luboha čałavieka zachvareŭ prastudaj — balničny, chtości tam nahu złamaŭ — balničny, a ja trapiŭ u avaryju — jašče i hrošaj pavinien. Nu jak heta nazyvajecca? Navat śmiešna kazać. Ja pytaŭsia i ŭ lekaraŭ, pytaŭsia i ŭ jurystaŭ, u siabroŭ pytaŭsia, i ŭsie na mianie hladziać, jak na idyjota. Nichto takoha nie čuŭ».
Adnak Fond sacabarony stajaŭ na svaim, i Dźmitryju pryjšło druhoje apaviaščeńnie. U vypadku admovy viartać hrošy navat pahražali pazovam u ekanamičny sud. U balnicy tym časam paćvierdzili: hety čałaviek sapraŭdy chvareŭ, i navat paśla vypiski jamu nielha było adrazu vychodzić na pracu.
Aleh Haŭruška, zahadčyk niejrachirurhičnaha adździaleńnia Homielskaj abłasnoj kliničnaj balnicy: «Traŭma ŭ jaho była čerapna-mazhavaja siaredniaj stupieni ciažkaści, miełasia krovaźlićcio ŭ rečyva hałaŭnoha mozhu, i rana była na hałavie».
U rajonnym adździele Fondu sacyjalnaj abarony razvodziać rukami: vypadak sapraŭdy kazusny. Z adnaho boku, Dźmitryj nasamreč paciarpieŭ i znachodziŭsia na balničnym. A z druhoha — jon vinavaty ŭ avaryi, i, kali prytrymlivacca praviłaŭ Fonda, tyja, chto pryčyniŭ škodu, pavinny kampiensavać vydatki. Tolki voś Dźmitryj pryčyniŭ jaje nie kamu-niebudź, a samomu sabie. Ale pra takija vypadki, zajavili ŭ Fondzie, ni ŭ praviłach, ni va ŭkazach arhanizacyi niama navat zhadki.
Likvidavać prabieł čynoŭniki paabiacali ŭ najbližejšy čas.
