«BČ palić, dali mienšy pa pamieru ciahnik zamiest taho, što pavinien byŭ być. Šmat ludziej staić u vahonach», — uranku ŭ subotu paviedamiŭ «Našaj Nivie» čytač Jaŭhien Žučkoŭ.
Ranicaj u subotu ciahnik № 801 Minsk—Vilnia adpraviŭsia ź biełaruskaj stalicy «karaciejšy», jak zvyčajna: miescaŭ dla ŭsich pasažyraŭ z kvitkami mienavita na hety ciahnik brakavała.
Toje, što naśpiavaje prablema, ludzi stali adčuvać chvilin za dziesiać da adpraŭleńnia, kali stali prychodzić, a ich miescy ŭžo zaniatyja.
Fota vysłali pasažyry.
Pavodle vidavočcy, niezadavolenyja pasažyry-mužčyny błakavali dźviery vahonaŭ, patrabavali načalstva: chacieli pačuć tłumačeńnie. U vyniku tolki zatrymali adpraŭleńnie. U niejki momant pa hučnaj suviazi abjavili, maŭlaŭ, ludzi mohuć admovicca ad kvitkoŭ, hrošy im viernuć.
Ale nichto, abo amal nichto, z vahonaŭ nie vyjšaŭ. U 8.25, sa spaźnieńniem, ciahnik ŭsio-tki vyjšaŭ. Mnohija ciapier jeduć, prosta siedziačy na padłozie. Niamała pasažyraŭ ź dziećmi.
Paźniej Biełaruskaja čyhunka prakamientavała situacyju.
Pa techničnych pryčynach płanavany da adpraŭleńnia dyziel-ciahnik u 4-ch vahonnym vykanańni ŭ rejs vyjści nie zmoh. Było pryniata rašeńnie ab vydačy ŭ rejs inšaha ciahnika ź mienšaj kolkaściu pasadačnych miescaŭ, rastłumačyŭ namieśnik načalnika pasažyrskaj słužby DA «Biełaruskaja čyhunka» Alaksandr Kazačok. «Byli adpraŭlenyja ŭ Vilniu ŭsie pasažyry, chto chacieŭ. Na žal niekatorym pryjšłosia jechać stojačy», — skazaŭ jon.
Biełaruskaja čyhunka prynosić prabačeńni za dastaŭlenyja niazručnaści.
