Skrynšot ź videa.
Alaksandr Łukašenka zaklikaŭ Rasiju vyznačycca z budučyniaj sumiesnych intehracyjnych prajektaŭ. Ab hetym kiraŭnik dziaržavy zajaviŭ na sustrečy ź dziaržaŭnym sakratarom Sajuznaj dziaržavy Ryhoram Rapotam.
Alaksandr Łukašenka adznačyŭ, što hałoŭnaje pytańnie, jakoje jon chacieŭ abmierkavać z Ryhoram Rapotam, — heta, viadoma ž, intehracyjnyja prajekty i prablemy ŭ sajuznym budaŭnictvie Biełarusi i Rasii.
«Nie chavaŭ i nie budu ŭ hetaj razmovie chavać: zanadta šmat prablem namieciłasia ŭ nas u krainie, zanadta šmat krytyki ŭ adras nie tolki intehracyi na ŭzroŭni dźviuch dziaržaŭ, ale i na ŭzroŭni Jeŭrazijskaha ekanamičnaha sajuza, SND.
Choć SND tuju funkcyju, jakuju moža vykonvać, vykonvaje i ruchajecca tymi tempami, jakija my zadajem. Hałoŭnaje — heta, viadoma ž, Jeŭrazijski ekanamičny sajuz i sajuz Biełarusi i Rasii», — padkreśliŭ kiraŭnik dziaržavy.
Łukašenka adznačyŭ, što ŭ minułym hodzie handlova-ekanamičnyja adnosiny Biełarusi i Rasii byli nie na lepšym uzroŭni. U hetym hodzie pakul nie ŭdałosia nahnać upuščanaje.
«Heta nikudy nie varta. My zaŭsiody hanarymsia tym, što voś tavaraabarot źniziŭsia, ale ŭ naturalnym vyražeńni my dadali. Heta śviedčyć ab tym, što my pačali pastaŭlać u Rasiju vialikija abjomy, ale pa cenach napałovu nižej. Jakaja dachodnaść Biełarusi ad hetaha? Praktyčna nijakaj», — skazaŭ Alaksandr Łukašenka.
«My cielapajemsia (inakš nie skažaš) i ŭžo niekalki miesiacaŭ nie možam damovicca pa canie na haz. U suviazi z hetym Rasija źniziła pastaŭki nafty ŭ Biełaruś. My heta ŭsprymajem jak cisk na Biełaruś, ale cisku ja nie paciarplu i biełarusy taksama», — zajaviŭ kiraŭnik dziaržavy.
Alaksandr Łukašenka dadaŭ, što pry pastaŭkach u Rasiju błakujucca niekatoryja biełaruskija tavary, asabliva pradukty charčavańnia, jakija zakuplaje Jeŭrasajuz.
«U Rasii jany čamuści «niajakasnyja». Ale zrazumieła: kali my pastaŭlajem jakasny tavar i pa prymalnych cenach u Rasiju, my bjom pa kišeniach aliharchaŭ ad sielskaj haspadarki ŭ Rasii, — źviarnuŭ uvahu biełaruski lidar. — Jany cisnuć na ŭrad (tam suviazi, vy viedajecie nie horš za mianie, jakija), a ŭrad daje kamandu «fas» roznaha rodu čynoŭnikam — ad Raśsielhasnahlada i hetak dalej. Jany ŭ nas try pradpryjemstvy adkryvajuć dla pastavak — piać zakryvajuć, piać adkryvajuć — šeść potym zakryvajuć. Idzie nieprychavany cisk.
«Ja čamu adkryta pra heta kažu? Bo ŭžo nadakučyła, heta ŭžo cieraz kraj, dalej tak praciahvacca nie moža. Jašče kažu heta tamu, kab vy razumieli, na jakim fonie my siońnia havorym pra dalejšaje raźvićcio našaha sajuznaha prajekta.
Toje, što ja skazaŭ, ni ŭ jakim razie nie aznačaje, što my budziem u niejkim płanie zhortvać intehracyjnyja prajekty, ale svoj udzieł u hetych prajektach my budziem aptymizavać, — zaŭvažyŭ jon. — Ja daŭ takoje rasparadžeńnie uradu i Administracyi prezidenta. My ciapier vielmi ŭvažliva analizujem naš udzieł, pierš za ŭsio, u Jeŭrazijskim ekanamičnym sajuzie.
Kali tak budzie praciahvacca — navošta nam tam trymać kuču čynoŭnikaŭ? Tam, pa-mojmu, užo kala tysiačy ŭ tak zvanym ŭradzie ŭ JEAES. I jaki vynik? Navošta płacić hrošy na ŭtrymańnie ŭ Maskvie vysakakłasnych śpiecyjalistaŭ?
My lepšych tudy addali. My im znojdziem pracu tut, a toje, što tam buduć prymacca rašeńni, my ź imi pahodzimsia, bo ich praktyčna niama. My parušajem ŭsio, pra što damovilisia.
Kiraŭnik dziaržavy źviarnuŭ uvahu, što stavić prablemnyja pytańni nie dla taho, kab kančatkova ŭźniać abureńni.
«Nie, ni ŭ jakim razie. Ale ja jašče raz kažu: chavać heta nielha. My pavinny dakładna vyznačycca: ci my idziem na pahłyblenuju intehracyju dziaržaŭ, ci nie. I samaje hałoŭnaje: my budziem vykonvać zaklučanyja dahavory i abaviazacielstvy abo nie budziem? Voś heta hałoŭnaje pytańnie dla nas», — kanstatavaŭ biełaruski lidar.
«Vy dobra viedajecie Biełaruś, našu situacyju i stanovišča. Vy vydatna razumiejecie, što my nie źbirajemsia biehčy napieradzie paravoza i kahości zališnie tuzać — nam heta nie treba. My zaŭsiody imknulisia prystasavacca da svaich susiedziaŭ, kab im nie pieraškadžać, ale ŭ nas ža jość ułasny intares. Tamu chaciełasia b pačuć vaš punkt hledžańnia, jak vy ŭ Pastajannym kamitecie heta aceńvajecie i jak budziem dziejničać dalej. I prosta vas paprasić jak čałavieka, addanaha našamu adzinstvu, bolš aktyŭna padklučycca na ŭzroŭni ŭrada i prezidenta Rasii da adstojvańnia ahulnych intaresaŭ, kab my choć niejak ruchalisia napierad», — skazaŭ na zakančeńnie Alaksandr Łukašenka.
