Ministerstva vyrašyła abnavić dyzajn svajho sajta i hatova vykłaści za heta 40 tysiač rubloŭ biudžetnych hrošaj.
Infarmacyja pra toje, što Minabarony šukaje studyju, jakaja voźmiecca za redyzajn partała, była źmieščanaja na sajcie dziaržzakupak.
Tak vyhladaje siońnia startavaja staronka viedamstva:
Minabarony choča, kab dyzajn sajta staŭ adaptyŭnym pad mabilnyja pryłady, plus — źjaviŭsia šabłon dla ludziej z abmiežavanymi mahčymaściami. Usie patrabavańni možna znajści ŭ adpaviednym dakumiencie, jaki prykładzieny da zajaŭki.
Zhodna z patrabavańniami Minabarony, pieramoža ŭ tendary kampanija, jakaja prapanuje najnižejšy košt. Pakul što «aŭkcyjon» prypynieny praz skarhi ŭdzielnikaŭ.
Ale z dakumientaŭ zrazumieła, što ŭ tendary pieramahła kampanija «Studyja Baravoha», jakaja ŭziałasia abnavić sajt amal za 35 tysiač biełaruskich rubloŭ (kala $19 tysiač).
Kampanija «Hienijalny štab» abskardžvaje vyniki. Jaje pradstaŭniki prasili za svaje pasłuhi ŭ paŭtara razu mienš — 21 tysiaču rubloŭ (kala $11 tysiač).
«Hienijalny štab» ličyć, što jaho vykinuli z tendaru pa nadumanych pryčynach. Aficyjna ad pasłuh «Štaba» admovilisia, bo kampanija nie pradastaviła daviedku ab adsutnaści zapazyčanaści pa padatkovych płaciažach z adpaviednymi podpisami i hierbavaj piačatkaj. U «Štabie» ličać, što kankretna hetaje patrabavańnie — prydzirka, kab addać pieramohu inšaj studyi.
Adznačym, što «Studyja Baravoha» raniej šmat pracavała nad dziaržzamovami. Jana rabiła sajt Kupałaŭskaha teatra, karparatyŭny sajt MTZ, sajt biełaruskaj płaciežnaj sistemy «Biełkart».
Kab acanić, kolki moža kaštavać praca nad sajtam pa patrabavańniach Minabarony, «Naša Niva» źviazałasia z dvuma niezaležnymi śpiecyjalistami pa veb-dyzajnie.
Adzin acaniŭ padobnuju pracu ŭ sumu, nie bolšuju za $3-4 tysiačy. Druhi nazvaŭ $6-10 tysiač.
