Amal piaćdziasiat hramadzian Rasii, jakija lacieli ŭ Kijeŭ praź Minsk, viarnuli ŭ biełaruskuju stalicu z-za taho, što ich nie prapuścili ŭkrainskija pamiežniki. Infarmacyju TUT.BY paćvierdziŭ Dziaržpahrankamitet Biełarusi.
Pavodle infarmacyi rasijskich «Iźviestij», u paniadziełak uviečary pamiežniki Ukrainy nie puścili ŭ krainu kala 30 rasijanaŭ, jakija pryjechali ŭ Kijeŭ (aeraport Žulany) rejsami «Biełavija». Avijakampanija pavinna była adpravić rasijanaŭ nazad u Minsk pieršym ža rejsam.
U Dziaržaŭnym pamiežnym kamitecie Biełarusi ŭ razmovie z TUT.BY paćvierdzili infarmacyju ab viartańni niekatorych rasijanaŭ.
— Pačynajučy z učorašniaha dnia amal piaćdziasiat čałaviek viarnuli ŭ Minsk. Heta zakranuła čatyry rejsy «Biełavija»: troch učora i jašče adnaho siońnia. Samaja šmatlikaja hrupa viernutych była siońnia. Kali ŭčora viarnulisia 12 čałaviek, to siońnia — 35, — raspavioŭ aficyjny pradstaŭnik Dziaržpahrankamiteta Anton Byčkoŭski.
Pradstaŭnik Dziaržpahrankamiteta adznačaje, što da ŭsich hetych rasijanaŭ u biełaruskich pahraničnikaŭ na vylecie nie ŭźnikła pytańniaŭ.
— My ich aformili vyznačanym paradkam, jany palacieli rejsami va Ukrainu, zatym viarnulisia nazad z-za niapropusku sumiežnaj krainaj. Pryčyna niapropusku nie nazyvajecca. Infarmacyi ad dziaržaŭnaj pamiežnaj słužby Ukrainy pa źmianieńni paradku pierasiačeńnia miažy zamiežnymi hramadzianami, u tym liku Rasijskaj Fiederacyi, nie pastupała, - paviedamiŭ Anton Byčkoŭski.
Adznačym, što vykarystoŭvajuć minski aeraport jak tranzitny dla palotaŭ va Ukrainu ŭ tym liku pasažyry ŭkrainskaj avijakampanii «MAU». Pavodle infarmacyi Dziaržaŭnaha pamiežnaha kamiteta Biełarusi, z hetymi rejsami hramadzian Rasijskaj Fiederacyi ŭ Minsk nie viartali.
