U Hrodnie skončyŭsia sud nad majstram cecha AAT «Hrodna Azot», jaki abvinavačvaŭsia ŭ parušeńni praviłaŭ pažarnaj biaśpieki, što paciahnuła pa nieaściarožnaści śmierć čałavieka. Mikałaj Saŭl pryznany nievinavatym i apraŭdany za adsutnaściu ŭ jaho dziejańniach składu złačynstva, piša Tut.by.
Sud pa vybuchu na «Azocie» pačaŭsia jašče ŭletku 2017 hoda. Abvinavačany byŭ tolki adzin — majstar pa ramoncie technałahičnaha abstalavańnia Mikałaj Saŭl, u padparadkavańni jakoha znachodzilisia 14 čałaviek. Mužčyna abvinavačvaŭsia ŭ parušeńni praviłaŭ pažarnaj biaśpieki, što paciahnuła pa nieaściarožnaści śmierć čałavieka.
Jamu pahražała da siami hadoŭ pazbaŭleńnia voli.
Škoda pradpryjemstvu acanili amal u 94 tys. rubloŭ.
Paciarpiełyja, a ich šaściora, nie pradjaŭlali materyjalnych pretenzij da Saŭla.
Mikałaj Saŭl z abvinavačvańniem byŭ nie zhodny i raspaviadaŭ, što z 2013 hoda jon pracavaŭ majstram pa ramoncie, da hetaha niekalki hadoŭ pracavaŭ na «Hrodna Azocie» mantažnikam. Kazaŭ, što svaje słužbovyja abaviazki viedaŭ i vykonvaŭ.
24 červienia 2019 hoda kryminalnaja pieraśled mužčyny byŭ spynieny. Sud pryjšoŭ da vysnovy, što ŭ dziejańniach majstra cecha adsutničaje skład złačynstva. Prysud u zakonnuju siłu nie ŭstupiŭ i moža być abskardžany i apratestavany.
Nadzvyčajnaje zdareńnie adbyłosia na pradpryjemstvie 6 červienia 2016 hoda. Pry praviadzieńni ahniavych rabot (ramontniki raśpiłoŭvali pry dapamozie hazavaha abstalavańnia mietaličnyja kanstrukcyi) iskry trapili na hidraksiłaminsulfat. U vyniku praduktami jaho termičnaha raskładańnia atrucilisia i paźniej pamierli dvoje rabočych, jašče troje byli špitalizavany.
Zahinułyja - chłopcy, jakija zajmalisia budaŭničymi rabotami ŭ adnym z cechaŭ pradpryjemstva. Im było 35 i 28 hadoŭ. Vidavočcy kazali, što zadymleńnie adbyłosia z-za vybuchu paroŭ, jakija sabralisia ŭnutry centryfuhi, jakuju jany ramantavali.
