Jana i jaje dzieci pakinuli Ukrainu 8 krasavika i znajšli prytułak u brytancaŭ u Notynhiemšyry.
Na zdymku, zroblenym u kancy maja, u kadr trapiŭ tank, jaki ruchaŭsia mima razbomblenych žyłych damoŭ u horadzie Papasnaja ŭ Łuhanskaj vobłaści, jaki kantralujuć rasijskija siły z 8 maja. Mnohija žychary akupavanych ukrainskich terytoryj skardziacca na maradziorstva z boku rasijskich vojskaŭ.
Pa słovach Aliny Karaniuk, fota było zroblenaje niepadalok ad jaje doma. Pieršym jaho zaŭvažyŭ jaje muž.
«Jon spytaŭ: vy nie zaŭvažajecie ničoha dziŭnaha na hetym fota? I ŭdakładniŭ, ci baču ja toje ž, što i jon», — raspaviała žančyna «Bi-bi-si».
Pa słovach Aliny, akramia bojlera, na tanku byli abrus ź ich dačy, novyja dziciačyja praściny z malunkami Disney i čyrvonaja koŭdra.
Karaniuk dadała, što paścielnaj bializnaj niešta prykryvali, imavierna, televizar ci inšaje elektronnaje abstalavańnie, jakoje siamja pakinuła ŭ domie, kali vymušana vyjechała z Papasnaj.
Ale takija pavodziny rasijskich sałdat žančynu nie ździŭlajuć.
«Toje, što nie źniščyli, jany abrabavali, — kaža jana. — My čakali, što damy ŭ Papasnaj abrabujuć, nam pra heta nieadnarazova kazali».
Alina Karaniuk i jaje dočki, 12-hadovaja Kryścina i 8-hadovaja Volha, vyjechali ŭ Brytaniju pa prahramie brytanskaha ŭrada «Dom dla Ukrainy».
Siamja, jakaja zaprasiła ich u svoj dom, — adna ź pieršych u krainie zarehistravałasia dla ŭdziełu ŭ hetaj prahramie.
Supracoŭnica palicyi i były dziciačy psichołah Alina Karaniuk i jaje siamja źbiehli z Papasnaj 24 lutaha, kali pačałosia šyrokamaštabnaje ŭvarvańnie.
Źjazdžajučy, siamja zabrała vielmi mała majomaści. Maci Aliny była vymušanaja pakinuć sabaku, jaki zahinuŭ albo ad abłomka snarada, albo ad ruk akupacyjnych vajskoŭcaŭ.
Karaniuk taksama raspaviała brytanskim ŚMI pra ciažkoje padarožža, jakoje jana i jaje dački ździejśnili z Ukrainy ŭ Brytaniju.
Jaje maci, babula i muž zastalisia va Ukrainie, ale znachodziacca ŭ adnosnaj biaśpiecy.
