Kali mierkavać pa adkazach, to paśla pačatku vajny, 24 lutaha, IT-śpiecyjalistaŭ źjechała bolš, čym u pramiežak sa žniŭnia 2020-ha pa luty 2022 hoda.
Ale heta nie kaniec. Jak śviedčyć apytańnie, na čamadanach siadzić jašče pałova ad kolkaści tych pracaŭnikoŭ, što źjechali. Stolki ž ludziej ćviorda viedajuć, što zastajucca.
Siarod tych, chto źjechaŭ, niamała tych, chto praciahvaje pracavać na ofis u Biełarusi. Razam z tymi, chto zastaŭsia i rychtujecca, heta 57%. Kožny treci čałaviek płacić padatki ŭ biudžet RB, astatnija — krainie pražyvańnia. Ale bolš za tracinu ŭsich udzielnikaŭ apytańnia addajuć padatki za miažu.
Tolki pałova ŭdzielnikaŭ apytańnia ŭpeŭnienyja, što ofis ich kampanii ŭ Biełarusi praciahnie pracu. Dla jašče 40% budučynia ich ofisa — u tumanie, amal 20% kanstatujuć abo pradrakajuć zakryćcio biznesu ŭ krainie.
Supracoŭnikaŭ, jakija miarkujuć, što ich kampanii nie adčuvajuć ciapier asablivych prablem, mienš za 10%. Pieravažnaja bolšaść pieraličvaje kłasičnyja simptomy «hieataksikozu» — źniknieńnie zakazaŭ, reputacyjnyja vydatki, składanaści z hrašovymi pieravodami.
Prypynieńnie najmu — pieršaja reakcyja kampanij na šok. Pavodle apytańnia, 40% ź ich pierastali najmać ludziej.
Kolkaść supracoŭnikaŭ, čyje kampanii pa-raniejšamu najmajuć śpiecyjalistaŭ, kareluje z kolkaściu tych, chto nijak nie adčuŭ na sabie ŭpłyŭ kryzisu — i tych, i inšych u rajonie 40%. Supadzieńnie ŭ inšaj pary hrup — «najmu niama», «adčuvajuć upłyŭ kryzisu» — takoje ž. Tyja ž 40%. Samyja častyja prablemy ŭ tych, kaho kryzis zakranuŭ, — zamarozka pierahladu ZP, zvalnieńni.
Kampanii, u jakich zusim niama prahram rełakacyi, — u absalutnaj mienšaści. Jak i tyja, dzie pierajezd — abaviazkovaja ŭmova pracy. Vybar — zastavacca ci źjaždžać — u bolšaści ŭsio ž jość.
Vybirać krainu taksama mohuć amal usie. U kožnaha čaćviortaha pracaŭnika jość vybar z dvuch łakacyj, dźvie traciny mohuć jechać na ŭsie čatyry baki, praŭda, čaściakom za svoj košt. Tych, kamu zadajuć strohi napramak, mienš za 10%.
Samyja chadavyja napramki pierajezdu pradkazalna — Polšča, Hruzija, Litva. Paśla 24 lutaha ŭ lik papularnych łakacyj uvajšoŭ i Uźbiekistan, a jašče Turcyja.
Bolš za 80% udzielnikaŭ ankietavańnia paviedamili, što kampanii dapamahajuć im ź pierajezdam.
Akramia tradycyjnych formaŭ padtrymki (vizy, rełakiejt-bonusy, łahistyka) važnaje miesca zajmaje indeksacyja zarobkaŭ dla novych rehijonaŭ. Jaje prapanavali 35% udzielnikaŭ.
A što, kali nikudy nie jechać? Mahčymaść praciahvać pracu ź Biełarusi jość bolš čym u 70% apytanych, praŭda, mnohim nie dajuć nijakich harantyj. Častka supracoŭnikaŭ adznačyła, što daviadziecca šyfravacca, šukać «mylicy» abo adkryvać IP za miažoj.