Raśpićcio piva i słabaałkaholnych napitkaŭ u hramadskich miescach budzie zabaroniena ŭ Biełarusi z 23 lutaha.
Heta praduhledžana zakonam «Ab uniasieńni źmianieńniaŭ i dapaŭnieńniaŭ u niekatoryja kodeksy Respubliki Biełaruś pa pytańniach kryminalnaj i administracyjnaj adkaznaści», jaki aficyjna apublikavany ŭ siońniašnim vydańni Nacyjanalnaha rejestra pravavych aktaŭ Biełarusi i ŭstupić u siłu praź miesiac.
U pryvatnaści, zakonam ustanaŭlivajecca administracyjnaja adkaznaść za raśpićcio słabaałkaholnych napitkaŭ i piva na
vulicach, stadyjonach, skvierach, parkach, u hramadskim transparcie i inšych hramadskich miescach, akramia tych, jakija pryznačany dla ich užyvańnia.
Štrafnyja sankcyi buduć takija ž, jak i za raśpićcio ŭ hramadskich miescach śpirtnych napitkaŭ. Pieršy raz daviadziecca raskašelicca na sumu da
8 bazavych vieličyniaŭ (ciapier adna bazavaja vieličynia składaje Br35 tys.).
Pry paŭtornym takim pravaparušeńni na praciahu hoda ŭžo daviadziecca zapłacić ad 2 da 15 bazavych vieličyniaŭ.
Novym zakonam vyznačajecca taksama adkaznaść za vyrab fizičnymi asobami mocnych ałkaholnych napitkaŭ, ich nabyćcio (za vyklučeńniem tych, prodaž jakich dazvoleny), nabyćcio samahonu, paŭfabrykataŭ dla jaho vyrabu, brahi, zachoŭvańnie samahonnych aparataŭ, a taksama bolš jak 5 ł samahonu abo 30 ł brahi. Pad mocnymi ałkaholnymi napitkami i samahonam razumiejucca ałkaholnyja napitki z abjomnaj dolaj etyłavaha śpirtu 28 pracentaŭ i bolš. Tamu ŭ amataraŭ chatniaha vina i roznych nastojek dla tryvohi, vidać, niama pryčyn.
