Za łastaŭkaj — u vyšyniu!
Bližej k adviečnamu ahniu!
Tudy, dzie chmarki tałakoj,
Dzie ruch niaspynny i spakoj.
Aleś Kornieŭ «Uśled za łastaŭkaj»
3 listapada 2010 hoda baranavickaja hramadskaść adznačyła 75-hodździe z dnia narodzinaŭ miascovaha paeta Alesia Kornieva. 33 hady jon samaaddana lačyŭ ludziej, natchniona zajmaŭsia lasnoj skulpturaj i mastactvam, ale najbolš siabie prajaviŭ u paezii, napisaŭšy 14 zbornikaŭ vieršaŭ. U Baranavičach Aleś Kornieŭ pakul samy stvaralny paet i tvorca. Jon pačaŭ pisać pieršyja vieršy jašče ŭ škole, zatym u instytucie. Jaho pieršy zbornik vieršaŭ nazyvajecca «Uśled za łastaŭkaj», a samy patryjatyčny — «Kryžy ziamielki našaj», u jakim aŭtar pakazvaje ŭ vieršavanaj formie trahična-hieraičnuju historyju našaj ziamli ad Rahniedy da pieršaha hieroja Biełarusi Uładzimira Karvata. Hety zbornik vieršaŭ paet padaravaŭ ajcu Alaksandu Nadsanu — stvaralniku Łondanskaj biblijateki imia Franciška Skaryny.
Ale najbolš paet Kornieŭ prasłaviŭsia luboŭnaj lirykaj, raskryćciom intymnych adnosinaŭ pamiž mužčynam i žančynaj. Temie kachańnia pryśviečanyja takija zborniki vieršaŭ, jak «Žanočyja napievy», «Pad zorkaj Miłavicaj», «Nieŭtajmoŭny seksafon». Mienavita za zbornik vieršaŭ «Nieŭtajmoŭny seksafon» Aleś Kornieŭ atrymaŭ bieraściejskuju miadovuju litaraturnuju premiju (pud miodu i dypłom), jakuju zasnavaŭ u 2001 hodzie pružanski pradprymalnik Mikałaj Papieka.
Alesia Kornieva vinšavali miascovyja paety Aleś Bieły, Ivan Łahvinovič, Anastasija Žuk, Ludmiła Šuvałava, Raisa Ramančuk, Mikałaj Zajcaŭ, a taksama kalažanka pa byłoj pracy Branisłava Sałaŭjova. Siabry TBM padaravali kalarovaje fota paeta kala abraza Madonna del Paskolo, kali ŭračysta adznačalisia 280-ja ŭhodki karanacyi Ikony Maci Božaj Žyrovickaj 19 vieraśnia 2010 hoda. Vielmi ciopła vinšavała paeta kiraŭnica narodnaha muzieja imia Valancina Taŭłaja Nina Šaviel i jaje navučency, jakija čytali lubimyja vieršy Kornieva. A Natalla Urubleŭskaja prezientavała apošnija knihi Alesia Kornieva «Miadovy polus» i «Jak pieśnia, hod minaje». Ale najbolš urazili ŭsich prysutnych navučency i nastaŭniki SŠ № 4 i № 17, jakija śpiavali mnostva pieśniaŭ na vieršy Alesia Kornieva.
Viktar Syryca, staršynia Baranavickaj rady TBM
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
