Niahledziačy na toje što 2021 hod akazaŭsia vielmi niaprostym i nie asabliva nasyčanym na pryjemnyja padziei, u im chapała momantaŭ, jakija vyklikali ŭśmiešku. «Naša Niva» zhadała 20 śmiešnych momantaŭ sychodziačaha hoda.
Biełarus u adzinočku vypichnuŭ aŭtobus u Varšavie
U lutym u repartaž telebačańnia z zaśniežanych vulic Varšavy trapiŭ biełarus, jaki adzin pichaŭ aŭtobus, jaki buksavaŭ na abledzianiełaj darozie.
Chłopiec nie ŭmieŭ havaryć pa-polsku, adkazvaŭ reparcioru pa-biełarusku i zdoleŭ mabilizavać jaho na dapamohu.
Paśla Źmitra Sałahuba ŭznaharodzili 90-dzionnym kvitkom na hramadski transpart. Taksama chłopcu pastupiła mnostva prapanoŭ biaspłatna vyvučać polskuju movu.
Jak delehataŭ adpraŭlali na «Usiebiełaruski narodny schod»
Dziaržprapahanda ŭsialak sprabavała prademanstravać značnaść mierapryjemstva, tamu ŭ rajonkach i praŭładnych kanałach masava źjaŭlalisia videa, jak delehataŭ z roznych kutkoŭ adpraŭlajuć na UNS. Miescami heta vyhladała davoli epična.
Na «Homsielmašy» pajšli dalej i vyrašyli pieraplunuć navat Paŭnočnuju Kareju.
Zarad enierhii i rašučaści ad vajenkama Kryvanosava
Sam «narodny schod» taksama nie zastaŭsia bieź śmiešnych situacyj. U druhi dzień nie chapiła času dla vystupu vajskovamu kamisaru Homielskaj vobłaści Andreju Kryvanosavu. Toj vyjšaŭ sa stanovišča, paprasiŭšy pacisnuć ruku Łukašenku, kab atrymać «zarad enierhii i rašučaści».
Heta byŭ nie kaniec. Praź niekalki dzion źjaviłasia adrazu niekalki videa, jak Kryvanosaŭ pieradaje «zarad rašučaści» svaim kaleham, a paśla i milicyjanieram.
Z časoŭ UNS miedyjaaktyŭnaść vajenkama značna źniziłasia. Vidać, zaradu enierhii chapiła nienadoŭha.
«Ja kinu ščas nach*r eta ŭsio, i ŭsio. Mnie eta sto let nie ŭsr*łasia»
Kamunalnika zaśpieli ŭ padjeździe za zamaloŭvaŭńniem BČB-ściaha i pačali zdymać. Jon pa telefonie skardzicca na heta i prosić vyklikać dapamohu.
Łyžnik trojčy pavaliŭsia kala Łukašenki
U łyžnaj honcy z Łukašenkam u Raŭbičach adzin z udzielnikaŭ zvaliŭsia try razy za paŭchviliny.
Hetym łyžnikam byŭ ciapierašni hienieralny sakratar fiederacyi chakieja Biełarusi Andrej Baško.
Samy ŭpłyvovy sabaka Biełarusi
Špic Łukašenki pa mianušcy Umka sioleta traplaŭ u niekalki viasiołych situacyj. Na Vadochryšča sabaka admoviŭsia pić kryničnuju vadu, a padčas intervju lažaŭ prosta na nakrytym stale.
Łukašenka biare sabaku z saboj paŭsiul: na «Słavianski bazar», vučeńni, chakiej i navat u Tadžykistan.
«Nakaži ich, Božie, nakaži»
U lutym pa kanale STB pakazali dziŭny rolik: pad słovy «Nakaži ich, Božie, nakaži» dy «Proklani ich, Božie, proklani» pakazvali videašerah z Hierasimieniaj, Babarykam, Łatuškam, Cichanoŭskaj i inšymi, a pad słovy «Sochrani ich, Božie» — delehataŭ UNS i Łukašenku.
Na praciahu hoda dziaržaŭnaja prapahanda prabiła nie adno dno, ale heta pieśnia stała sapraŭdnym miemam i pradmietam nie adnoj parodyi.
Tematyčnyja chaładcy da dnia jadnańnia narodaŭ Rasii i Biełarusi
U stałovych «Homielskich ciepłavych sietak» da dnia jadnańnia narodaŭ Rasii i Biełarusi pryhatavali tematyčnyja chaładcy.
Akramia straŭ, supracoŭnicy byli apranutyja ŭ narodnyja stroi, a ŭ stałovych hrała tematyčnaja muzyka. Jak piša karparatyŭnaje vydańnie, usie zastalisia zadavolenymi.
Vohnienny rybak sa Słucka
U krasaviku ŭ Słucku žurnalisty źniali rybaka, jaki spakojna vudziŭ rybu, niahledziačy na pałajučaje pole za śpinaj.
Praź niekalki dzion žurnalisty adšukali rybaka. Toj navat nie padazravaŭ, što staŭ hierojem miemaŭ, i dadaŭ, što hladzić tolki rasijskaje telebačańnie.
Jak u Homieli ŭračysta adkryvali pandus pasiarod łužyn
23 krasavika ŭ Homieli kala dziciačaj palikliniki adkryli kalasačnuju i pandus. Va ŭračystaj cyrymonii ŭziaŭ udzieł ceły deputat Pałaty pradstaŭnikoŭ Alaksandr Dančanka.
Pryčym na ahulnym płanie bačna, što padjezd da pandusa nie abstalavany: raźbityja bardziury, staić vada.
TEST. Što ŭračysta adkryvali biełaruskija čynoŭniki?
Pafarbavany abielisk u Mastach
Pierad Dniom pieramohi abielisk u Mastach, pryśviečany ziemlakam, jakija zahinuli ŭ hady vajny, u litaralnym sensie zaźziaŭ novymi farbami.
Namieśnica staršyni rajvykankama adznačyła, što stełu pafarbavali z metaj estetyčnaha ŭsprymańnia i ŭ tradycyjnyja dla biełarusaŭ kolery: zialony i čyrvony.
Epičnyja skulptury daišnika i bulby
Na Mastach tema pomnikaŭ-miemaŭ nie skončyłasia. U Breście pastavili skulpturu inśpiektara DAI, u jakoha vielmi dziŭny vyraz tvaru.
Ciapier dziŭnamu lubanskamu ratavalniku nie tak adzinoka.
A ŭ kastryčniku na terytoryi Viciebskaha zanalnaha instytuta sielskaj haspadarki ŭ ahraharadku Tułava na Viciebščynie pastavili skulpturu bulbiny, jakuju nazvali Antoškam.
Need for Speed na samakacie
U adnym ź minskich dvaroŭ chłopiec na samakacie virtuozna syšoŭ ad pahoni DAI. Što było dalej, nieviadoma.
Vybačeńni chakieistaŭ
U kancy žniŭnia biełaruskija chakieisty nie adabralisia na Alimpijadu, ale zapisali vinšavańnie Łukašenku, u jakim dziakujuć za kłopat ab chakiei.
Videa intanacyjami i ściaham na fonie nahadvaje pakajalnyja videa, jakija zdymajuć siłaviki z zatrymanymi.
Rahačoŭski Antoška
Zhuščonka z Rahačova abnaviła etykietki. U redyzajnie ŭličyli trend na talerantnaść. «Antoška» staŭ ciomnaskurym.
Buterbrody da «Dnia narodnaha adzinstva»
Da novaha dziaržaŭnaha śviata ŭ Babrujsku praviali aryhinalny kulinarny čelendž. Na dumku arhanizataraŭ, mierapryjemstva spryjała papularyzacyi i raźvićciu aktyŭnaj hramadzianskaj pazicyi i hramadzianskaj adkaznaści.
Syr pad zamkom
U kramie ŭ centry Minska prydumali niezvyčajny sposab abarony ad kradziažoŭ: syr i darahija rybnyja kansiervy stali pradavać u płastykavych skryniach na zamku.
U kantejniery niekalki ŭpakovak, kali chočacie kupić adnu, treba nieści ŭsio na kasu — pradaviec adamknie zamok.
Pa słovach supracoŭnicy, paśla taho jak pradukty stali zakryvać u skryni, kradziažoŭ stała adčuvalna mienš.
Łukašenka i maska
Na piku čarhovaj chvali karanavirusa Alaksandr Łukašenka pajechaŭ pa balnicach. U adnoj ź ich jaho daviałosia prymušać apranuć masku, što pryjšłosia palityku nie daspadoby.
Babry-źniščalniki i čupakabra ŭ Lepieli
7 vieraśnia ŭ Viciebsku vysadzili aleju z 100 vierbaŭ. A praź miesiac bolš za 65 drevaŭ akazalisia źniščanyja. Ekołahi miarkujuć, što vierby zhryźli babry, bo niedaloka znajšli naru.
Hałoŭny ekołah Viciebska Siarhiej Łazuka zajaviŭ, što budzie źviartacca ŭ Minpryrody z prośbaj vyłavić babroŭ-złačyncaŭ, kab pierasialić ich z centra Viciebska padalej ad horada.
A na Lepielščynie mjascovy žychar złaviŭ «čupakabru», chacieŭ zavieźci śpiecyjalistam, ale žyvioła źbiehła.
Žycharka ahraharadka Stai znajšła ŭ ciaplicy na ŭčastku nieviadomaha źviera i źviarnułasia da susieda, kab toj ahledzieŭ znachodku.
Viaskoviec vyrašyŭ źviarnucca da śpiecyjalistaŭ. Pakłaŭ žyviołu ŭ miašok i prynios u niežyły dom. Viarnuŭsia praz 20 chvilin — a źvier da taho momantu ŭžo źbieh. Što heta było — zahadka, mahčyma, čupakabra dahetul biehaje pa Lepielščynie.
Supracoŭniki navukova-praktyčnaha centra NAN Biełarusi pa bijaresursach vykazali dumku, što heta byŭ chvory karostaj janotapadobny sabaka.
«Šaŭrmahiejt» u Bruzhach
U łahier mihrantaŭ u Bruzhach u listapadzie pryhnali fudtrak z šaŭrmoj. Vakoł jaho adbyŭsia vialiki skandał — rasijskija žurnalisty pakazali siužet, u jakim nibyta pradaŭcy padnimajuć ceny na šaŭrmu ŭ try razy.
Haspadary fudtraka abvierhli heta, u vyniku, situacyja dajšła da Karajeva, pamočnika Łukašenki pa Hrodzienskaj vobłaści, jaki byŭ vymušany zapeŭnivać, što historyja z koštami — fejk.
Pałterhiejst u Baranavičach
Dva hady žycharki doma na vulicy Nakaniečnikava nie mahli žyć spakojna: na ścianie budynka skroź bieton prastupiła abličča žančyny. Abrysy vielmi vyraznyja, asabliva paśla daždžu, raskazali žychary miascovaj rajoncy.
Žančyny kazali, što «pałterhiejst» pa načach chapaje za nohi, za ruki, a taksama hrukaje ŭ ścianu i hučna płača. Piensijanierki mierkavali, što heta niesupakojenaja duša žančyny, jakaja pamierła hvałtoŭnaj śmierciu.
Praź niekatory čas ścianu prosta zafarbavali. Ale ci śpiać ciapier piensijanierki spakojna, nieviadoma.
Takim byŭ 2021 hod. Składany, trahičny, ale ŭ im było miesca humaru i kamičnym situacyjam. Zastajecca spadziavacca, što takich situacyj naleta stanie našmat bolš.
