Na dziaržtelebačańni raspaviali, čamu ŭ Biełarusi chočuć uvieści śmiarotnaje pakarańnie za zamach na teraryzm
Prapanova ŭvieści śmiarotny prysud za zamach na ŭčynieńnie akta teraryzmu stała adkazam na «zakliki da radykalnych dziejańniaŭ». Pryčynaj uzmacnieńnia žorstkaści miery pakarańnia stali dyviersii na čyhuncy, vynikaje ź siužetu ANT, piša Zerkalo.
Prapanovu ŭzmacnić adkaznaść za zamach na ździajśnieńnie akta teraryzmu ŭ efiry ANT rastłumačyli tym, što niekatoryja biełarusy adhukajucca na «zakliki da radykalnych dziejańniaŭ» z boku «ekstremistaŭ», «jakija zasieli ŭ Varšavie» i «kijeŭskich aficyjnych asob». Rabotniki telekanała pryvodziać u prykład zatrymanych u kancy sakavika traich žycharoŭ Babrujska.
Raniej MUS paviedamlała, što try čałavieki z hetaha horada padazrajucca ŭ datyčnaści da źniščeńnia relejnych šaf sihnalnaj ustanoŭki pad Asipovičami. Tady padčas zatrymańnia siłaviki ŭžyli zbroju. Adzin z mužčyn z atrymanym ranieńniem trapiŭ u balnicu.
Pad Babrujskam uskryli dźvie relejnyja šafy, adnu ź ich padpalili.
Siabra Pastajannaj kamisii pa nacyjanalnaj biaśpiecy Pałaty pradstaŭnikoŭ Maryna Lančeŭskaja ličyć prymianieńnie śmiarotnaha pakarańnia za sprobu terakta «całkam apraŭdanaj». «Napeŭna, hučyć žorstka, ale zamach — heta złačynstva, jakoje ździajśniajecca z pramym namieram. Asoba razumieje, jakija nastupstvy mohuć być. A jany mohuć być nadzvyčajnymi: masavaja hibiel ludziej, vielmi surjoznyja nastupstvy. Tamu papieradžalnaja, previentyŭnaja miera i prapanujecca», — zajaviła deputat.
27 krasavika deputaty Pałaty pradstaŭnikoŭ Nacyjanalnaha schodu pryniali zakonaprajekt ab źmienach u Kryminalny kodeks u dvuch čytańniach. Ciapier dakumient pavinny ŭchvalić u Saviecie respubliki, potym jaho musić padpisać Alaksandr Łukašenka. Kali heta adbudziecca, źmieny ŭ Kryminalny kodeks nabuduć moc praz 10 dzion paśla aficyjnaha apublikavańnia papravak.
