Hety pabočny efiekt uźnikaje, kali pić zanadta šmat piva. Jon vielmi niebiaśpiečny
Zanadta vialikija porcyi piva mohuć pryvieści da małaviadomaha, ale niebiaśpiečnaha stanu. Patamanija — tak jaho nazyvajuć — upieršyniu była zafiksavanaja ŭ 1972 hodzie, i jana moža źjaŭlacca niepasrednaj pahrozaj žyćciu.
Fota: pixabay.com
Dla našaha zdaroŭja vielmi važna, kab u arhaniźmie zachoŭvaŭsia bałans elektralitaŭ. Heta rečyvy, jakija pieranosiać elektryčny zarad, kali jany rastvoranyja ŭ vadkaści. Elektrality ŭ kryvi — natryj, chłaryd kaliju i bikarbanat — dapamahajuć rehulavać funkcyi niervaŭ i muskułaŭ, padtrymlivać kisłotna-ščołačny bałans u arhaniźmie, a taksama adkazvajuć za praviadzieńnie elektryčnych impulsaŭ, piša onet.pl.
Padčas patamanii ŭ kryvi źnižajecca kancentracyja važnych elemientaŭ, hałoŭnym čynam natryju. Heta adbyvajecca, kali my ŭžyvajem šmat vadkaści, u jakoj mała elektralitaŭ. Naprykład, takoje adbyvajecca, kali pić zanadta šmat vady, ale ŭ 1970-ja vučonyja vyśvietlili, što taki ž efiekt budzie ad pićcia vialikaj kolkaści piva.
Kali apustašyć paŭlitrovy kielich ź pivam, heta naŭrad ci vyklikaje patamaniju, ale niekalki litraŭ piva za karotki čas užo mohuć pryvieści da prablem. Havorka idzie pra 3-4 litry piva kožny dzień na praciahu niekalkich dzion. Mienšyja dozy, chacia i nie vyklikajuć bačnych razładaŭ, mohuć vyklikać źnižeńnie elektralitaŭ, bačnaje pa kliničnych analizach.
Kali patamanija źviazanaja z užyvańniem ałkaholu, jaje lohka pierabłytać z apjanieńniem. U takim vypadku ŭ čałavieka budzie baleć i kružycca hałava, u jaho pačnucca prablemy z maŭleńniem i kaardynacyjaj ruchaŭ. Ałkaholnaja intaksikacyja projdzie, kali čałaviek pierastanie pić, patamanija ž nie projdzie biez dapamohi miedyka. Doktar, napeŭna, prapiša pryjom natryju, ale lepš nie pić natryj biez kansultacyi ź miedykam, bo možna pamylicca z daziroŭkaj.
Kolki ž možna pić piva? Kali vy vypivajecie redka, varta nie pieravyšać dozu ŭ try paŭlitrovyja butelki piva. Kali ž vy pjacie bolš časta, vaš maksimum — dźvie paŭlitrovyja butelki ŭ dzień. Pry hetym razmova nie pra štodzionnaje spažyvańnie — rabicie chacia b dvuchdzionnyja pierapynki.
Narkołah — pra biaśpiečnyja dozy vypiŭki, samy škodny vid ałkaholu i toje, kali varta źviarnucca pa dapamohu
Daśledavańnie: mužčynam da 40 hadoŭ nielha pić bolš za čarku (nie kielich!) piva ŭ dzień
Złoŭžyvajecie ałkaholem? Vaša skura heta pakaža
